भक्तपुर नगरपालिकाका प्रमुख सुनिल प्रजापतिको अध्यक्षतामा मंगलबार बसेको सातौं नगरसभाको बैठकले भक्तपुर नगरपालिकाको आ.व. २०७७/७८ को नीति तथा कार्यक्रम सर्वसम्मतिले पारित गरेकाे छ । आ.व. २०७७/७८ को बजेत भाेलि मात्रै प्रस्तुत गरिने नगरपालिकाले जानकारी दिएकाे छ ।
बैठकमा नीति तथा कार्यक्रममाथि छलफलमा उठेका विषयहरुबारे प्रष्ट पार्दै नगर प्रमुख प्रजापतिले कोरोना भाइरस संक्रमणको जोखिमलाई ध्यानमा राखी यस आर्थिक वर्ष भक्तपुर नगरपालिकाले अनलाइनबाट प्राप्त नगरबासीहरूको राय सुझावको आधारमा नगर र नगरबासीहरूको हितमा नीति तथा कार्यक्रम तयार पारेको बताए। ख्वप विश्वविद्यालय सञ्चालनको लागि आवश्यक नीतिगत पहलहरू भइरहेको बताउँदै नगर प्रमुख प्रजापतिले आ.व. २०७७/७८ भक्तपुर नपाको सीमित आर्थिक स्रोतलाई ध्यानमा राखेर पूरा गर्न सकिने योजनाहरु छनाेट गरी आवश्यकताको आधारमा प्राथमिकतामा राखेको र मेलम्चीको पानी पहिलो चरणमा भक्तपुरमा वितरण गर्न आवश्यक प्रक्रिया अगाडि बढिरहेको बताए ।
नीति तथा कार्यक्रमको छलफलमा सभासद्हरूले नगरभित्रका खेतीयोग्य जमिन बाँझो राख्न नपाइने नीति आवश्यक भएको, ख्वप विश्वविद्यालय सञ्चालनको आवश्यक पहल गर्नुपर्ने, सहिदस्मृति र महेश्वरी खेलमैदानको स्तरोन्नति गर्नुपर्ने, कोरोना महामारी बढेको अवस्थामा टोल–टोलमा क्लोरिनयुक्त औषधि छर्कने कार्यलाई निरन्तरता दिनुपर्ने, नगरमा अवस्थित खुला ठाउँमा फोहर फाल्न निरुत्साहित गर्नुपर्ने, प्लम्बिङ तथा इलेक्ट्रिसियनको तालिम आवश्यक भएको, विद्युतीय शव दाहगृहको आवश्यकता रहेको, अरनिको सभाभवन र आदरनिकेतन निर्माण गर्नुपर्ने, कृषकहरूलाई समयसापेक्ष विभिन्न व्यवहारिक, प्रयोगाात्मक कृषि तालिम तथा उन्नत जातको बीऊ उत्पादन तथा नर्सरी व्यवस्थापन गर्न पुग्दो मात्रामा नपाकै कृषियोग्य जमिन व्यवस्थापन गर्नुपर्नेलगायतका सुझावहरू प्रस्तुत भएका थिए । उनीहरूले आर्थिक वर्षको अन्त्यमा गरिने विकास निर्माण गुणस्तरहीन हुन सक्ने, नगरका उपयुक्त ठाउँहरूको आकासे पानी संकलन र प्रशोधन गरी वितरणको व्यवस्था गर्नुपर्ने, तारहरूको भूमिगत व्यवस्थापन गर्नुपर्ने, नयाँ आवास निर्माण क्षेत्रहरूमा पनि कलात्मक पाटी पौवा, ढुंगेधारा तथा पोखरीहरू निर्माण गर्नुपर्नेलगायतका सुझावहरू व्यक्त गरेको थियो ।
नगरसभाको अर्को बैठक असार १० गते दिनको ३ बजे बस्ने गरी बैठक स्थगित गरेकाे छ भने सो बैठकमा भक्तपुर नगरपालिकाको आ.व. २०७७/७८ को बजेट प्रस्तुत गरिने कार्यक्रम रहेको छ ।
