न्यूज अपडेट
काठमाडौं, ३२ जेठ
अमेरिकी अनुदान सहायता प्रस्ताव एमसीसीबारे छलफल गर्न सत्तारूढ नेपाल कम्युनिस्ट पार्टी (नेकपा)ले आज ४ बजेका लागि बोलाएको सचिवालय बैठक फेरि स्थगित गरेको छ । यसअघि बोलाइएको सचिवालय बैठक पनि स्थगित गरिएको थियो ।
नेकपाले गत २७ गते पनि सचिवालय बैठक आह्वान गरेको थियो । अमेरिकी अनुदान सहायता प्रस्ताव मिलेनियम च्लालेन्ज कम्प्याक्ट (एमसीसी) नै मुख्य कार्यसूची बनाइएको त्यस दिनको बैठक अन्तिम समयमा स्थगित भएको थियो । सदनमा संविधान संशोधन प्रस्ताव प्रस्तुत गर्ने कार्यसूची रहेकाले बैठक सार्नुपरेको बालुवाटार स्रोतले बताएको थियो । तर अहिले किन बैठक स्थगित गरियो भन्ने बारेमा केही बताइएको छैन ।
“आज बोलाइएको सचिवालय बैठक स्थगित भयो,” नेकपा सचिवालय सदस्य झलनाथ खनालले बाह्रखरीसँग भने, “खोइ प्रधानमन्त्री बिरामी भएर हो कि किन हो बैठक स्थगित गरिएछ । कारण केही खुलाइएको छैन । अहिले बैठक स्थगित गर्नुपर्ने कुनै कारण देखिँदैन ।”
परियोजना लागु गर्नुपर्ने समय नजिकिँदै जाँदा एमसीसी संसद्ले अनुमोदन गर्ने कि नगर्ने भन्ने विवाद छ । प्रमुख प्रतिपक्षी दल नेपाली कांग्रेसले यसअघि नै पारित गर्न ध्यानाकर्षण गराइसकेको छ । कांग्रेस सरकारको पालामा (२०७४ भदौ २९ गते) अनुदान सम्झौतामा हस्ताक्षर भएकाले यो सरकारले एमसीसी बिनासर्त पास गर्नुपर्ने उसको मत छ । पूर्ववर्ती सरकारले गरेका निर्णय सरकारले कार्यान्वयन गर्नुपर्ने कांग्रेसको धारणा रहिआएको छ ।
सत्तारूढ दल नेकपा भने विभाजित भएको छ । सचिवालयमै मतैक्य छैन । स्थायी कमिटी र केन्द्रीय कमिटी बैठकमा एमसीसीका केही प्रावधान र एमसीसीसँग सम्बन्धित पूरक सम्झौताहरू असमान, राष्ट्रहित विपरीत रहेको निष्कर्ष निकाल्दै जस्ताको तस्तै पास गर्न नहुने मत बलियो भएको थियो ।
उता प्रधानमन्त्रीका प्रेस सल्लाहकार सूर्य थापाले भने पछिल्लो दिनमा प्रधानमन्त्रीलाई केही धपेडी भएको हुनाले आजको बैठक स्थगित गरिएको जानकारी दिए ।