न्यूज अपडेट
काठमाडौं, १२ जेठ
जल तथा मौसम पूर्वानुमान महाशाखाले नेपालको पश्चिमी भागमा आएको हावाहुरीसहितको वर्षा पूर्वतिर सर्ने क्रम रहेको जनाएको छ ।
महाशाखाका अनुसार पोखराभन्दा पूर्वको पहाडी भूभाग र मध्यको पहाडी भूभागमा हावाहुरी, मेघ गर्जनसहित वर्षा भइरहेको र यो प्रणाली पूर्वतिर सर्ने क्रममा रहेको जनाएको छ ।
यही प्रणालीका कारण तनहुँ गोरखा, धादिङको केही स्थानमा मध्यम वर्षा र चितवन, नुवाकोट, काठमाडौं उपत्यका, ओखलढुङगा, दोलखा, सिन्धुपाल्चोक र आसपास केही स्थानमा हल्का वर्षा भइरहेको जनाइएको छ ।
तनहुँ गोरखा, धादिङ भई बहने केही साना नदीमा आकस्मिक बहाव हुन सक्ने भएकाले तटीय क्षेत्रमा सोमबार रातीसम्म सतर्कता अपनाउन महाशाखाले आग्रह गरेको छ ।
आइतबार देशभर यस वर्षकै उच्च तापक्रम मापन गरिएको थियो ।
