न्यूज अपडेट
भक्तपुर, २० जेठ
भक्तपुर चाँगुनारायण नगरपालिका वडा नं ३ झौखेलका ३० वर्षीया गर्भवती महिलामा कोरोना संक्रमण पुष्टि भएको खुलेको छ ।
स्वास्थ्य तथा जनसंख्या मन्त्रालयका प्रवक्ता डा विकास देवकोटाले नियमित पत्रकार सम्मेलनमा चाँगुनारायण नगरपालिकाकी महिलामा संक्रमण पुष्टि भएको जानकारी दिएका थिए ।
चाँगुनारायण नगरपालिका वडा नं ३ का वडाध्यक्ष श्यामसुन्दर धिमालका अनुसार झौखेलमा बसोबास गर्दै आएकी गर्भवती महिला चेकजाँचका क्रममा काठमाडौं मेडिकल कलेज सिनामंगलमा आउजाउ गर्ने गर्थिन् । चिकित्सकका सल्लाह अनुसार प्रसुतिको समय नजिक आएकाले उनको जेठ १५ गते कोरोना परीक्षणका लागि स्वाब परीक्षण गरिएको थियो ।
परीक्षणको रिपोर्ट भने आज मंगलबार आएको थियो । उनको रिपोर्टमा पोजेटिभ देखिएको थियो । आजै केएमसी अस्पतालका ४ जना चिकित्सकलाई पनि संक्रमण पुष्टि भएको छ । संक्रमित महिलालाई पनि अस्पतालबाटै सरेको आशंका गरिएको छ ।
अहिले संक्रमित महिला बसोबास गर्ने क्षेत्रमा सिल गर्ने तयारी भैरहेको र संक्रमित महिलालाई अस्पताल लैजाने तयारी भैरहेको भक्तपुरका प्रमुख जिल्ला अधिकारी हुमकला पाण्डेले बताइन् ।
संक्रमित महिलासँग सम्पर्कमा रहेका व्यक्तिहरुको पहिचान गर्ने काम भइरहेको छ ।