न्यूज अपडेट
भक्तपुर, १६ भदौ
भक्तपुर च्याम्हासिंहस्थित वागीश्वरी माध्यमिक विद्यालयमा कक्षा १२ सञ्चालनार्थ शिक्षकहरुको साेमबार अनलाइन जुमबाट बैठक भएको छ । वैठकमा कक्षा ११ को भर्ना र प्रवेश परीक्षाबारे पनि जानकारी दिएको थियो ।
कार्यक्रममा कक्षा ११ र १२ का संयोजक ज्ञानसागर प्रजापतिले अबको अनलाइन कक्षा पहिलाको जस्तो मात्र कक्षा लिएर जाने नभइ विद्यार्थीसँगै अभिभावकले समेत अवलोकन गर्ने भएकाले चुनौतीपूर्ण रहेको बताए । उनले प्रभावकारी सिकाइविधिको प्रयोग गरी विद्यार्थीको मनोभवना जित्न पूर्व तयारीलाई व्यापक बनाउनुपर्ने बताए ।
त्यस्तै वागीश्वरी कलेजका प्राचार्य धनकुमार श्रेष्ठले नियमित नआउने र अनावश्यक प्रतिक्रिया दिने विद्यार्थीहरुलाई विद्यालय प्रशासनले कारवाही गर्नुपर्ने बताए । व्यवस्थापनका इन्चार्ज गेहेन्द्र प्रसाद दाहालले अहिलेको कक्षा नयाँ कोर्ष अनुसार जाने भएकाले प्रभावकारी भइ जानुपर्नेमा जोड दिए । उनले सिकाइ विधि प्रभावकारी हुने भएपछि यसमा ९५ देखि सतप्रतिशत विद्यार्थीको सहभागिता रहने अपेक्षा गरे ।
कार्यक्रममा विज्ञान संयोजक निरु ताल्चाभडेलले विद्यार्थीको पहुँच बढाउन विद्यालयमै सहायता कक्षको आवश्यकता रहेको बताइन् । परीक्षा इन्चार्ज पियूषराज गोसाईले प्रवेश परीक्षा राम्रोसँग गर्न आइटी विज्ञको साथ लिइ अगाडि बढ्नुपर्ने जानकारी दिए । त्यसको लागि आइटी विज्ञको टोली नै गठन गर्नुपर्ने बताए ।
विद्यालयका सहायक प्रधानाध्यापक कृष्ण प्रसाद कर्माचार्यले कक्षा ११ को नयाँ भर्ना प्रक्रिया, शुल्क निर्धारण, नयाँ पाठ्यक्रम र सिकाइ प्रक्रियाबारे स्पष्ट पारे । सभापतिको आसनबाट विद्यालयका प्रधानाध्यापक कृष्ण प्रसाद धन्छाले कक्षा १२ को अनलाइन कक्षा यही भदौ १८ गतेदेखि प्रभावकारी रुपमा कक्षा सञ्चालन गर्ने जानकारी गराउँदै आवश्यकताअनुसार प्रशासन र शिक्षकहरुलाई अनलाइन कक्षा सञ्चालनबारे तालिम दिने बताए । कार्यक्रममा नविन प्रजापति, विकल प्रजापति, नविन पौड्याल, विनोद प्रजापति, भानुभक्त हुमागाई, रमेश प्रजापति, विश्वेश्वर मानन्धरलगायतले कक्षा ११ र १२ को कक्षा सञ्चालनसम्बन्धमा आफ्नो धारणा राखेका थिए ।
