दक्षिण कोरियामा अबैधानिक रुपमा बसेको  कारण पक्राउ परि बिदेशी हिरासत गृहमा रहेका नेपालीले आफूलाई स्वदेश फर्किन बाटो खोलिदिनु पर्ने भन्दै हारगुहार गरेका छन् l

“भिसा नभएको कारण प्रहरीले पक्राउ गरेर हिरासत गृहमा राखेको पनि डेढ महिना हुन लाग्यो , अपराधि जस्तै बसिरहेका छौ l न बाहिर निस्किन पाउँछौ न स्वदेश फर्किन पाउँछौ ” बिगत डेढ महिनादेखि कोरियाको ह्वासंग स्थित बिदेशी हिरासत गृहमा रहेका एक नेपालीले गुनासो पोखे l

उनका अनुसार हाल उक्त हिरासत गृहमा ६ देखि ८ जना नेपाली छन् l सबैसंग भेट गर्न नपाइने हुनाले पूर्ण संख्या भने आफूलाई पनि यकिन नभएको बताए l उनीसंगै बस्ने इलामका एक  नेपाली बिगत ५ महिनादेखि उक्त जेलमा बस्दै आएको उनको भनाइ थियो l

” हिरासतमा जे  जति नेपालीसंग भेट भयो  सबैको अबस्था उस्तै छ , बिना अपराध लामो समयदेखि बन्दि भै बस्दा निकै नै मानसिक तनावमा परियो  सबै  जनाको चाहना नेपाल सरकारले उद्वार गर्दियोस् भन्ने छ ” उनले भने ।

कोरियामा बिना भिसा बसेका बिदेशी कामदारहरुलाई यहाँको अध्यागमन प्रहरीले पक्राउ गरिहाले  केही दिन बिदेशी हिरासत गृहमा राखी स्वदेश फर्काउने गर्दछ l

यसरी पक्राउ परेकाहरु स्वदेश फर्किने कागजात तथा प्लेन टिकट नमिल्दासम्म केही दिन मात्र हिरासत गृहमा बस्नु  पर्ने हुन्छ l  भिसा नभएकै  कारण उनीहरुलाई त्यस्तो अपराधिक मुद्वा चलाइदैन l तर उनीहरु हाल नेपाल सरकारले गरेको लकडाउनका कारण महिनौदेखि कोरियाको बन्दि गृहमा अपराधी जस्तै बस्न बाध्य छन् l