न्यूज अपडेट
चितवन, १२ साउन
घरेलु तथा साना उद्योग कार्यालयमा स्थापनाकालदेखि दर्ता भएका चितवनका सबै प्रकारका उद्योगहरु सञ्चालनमा हालसम्म २२ अर्ब भन्दा बढी लगानी भएको छ ।
कार्यालयका अनुसार उद्योग स्थापनादेखि हाल ती उद्योगहरुको कुल पूंँजी लगानी २२ अर्ब २८ करोड ३३ लाख ६ हजार रुपैंयाँ रहेको हो । यी मध्ये सबै भन्दा बढी उत्पादन मुलक उद्योगमा भएको छ भने सबै भन्दा कम निर्माणमुलक उद्योगमा रहेको छ ।
जसअनुसार उत्पादनमुलक उद्योगमा ८ अर्ब ४७ करोड ३ लाख ११ हजार र निर्माणमुलक उद्योगमा २ करोड ८० लाख रुपैंया कुल पुंँजी लगानी भएको छ । यस्तै कृषि तथा वनजन्य उद्योगको कुल पूंँजी लगानी ८ अर्ब ८१ करोड ९२ लाख ३९ हजार । सेवामुलक उद्योगको ३ अर्ब ९२ करोड ४ लाख ११ हजार , पर्यटनमुलक उद्योगको २ अर्ब ५३ लाख ५४ हजार र विज्ञान तथा सूचना प्रविधि उद्योगमा ३ करोड ९९ लाख ९० हजार कुलपूंँजी रहेको छ । तर खनिजजन्य र तथा उर्जामुलक उद्योग चितवनमा हालसम्म दर्ता नभएका कारण कुनै लगानी भएको छैन ।
ती उद्योगहरुको स्थीर पूंँजी १२ अर्ब ८६ करोड ८० लाख ४८ हजार रहेको छ चालु पूँजी ९ अर्ब ४१ करोड ५२ लाख ५९ हजार रहेको छ । जिल्लामा हालसम्म १२ हजार ५ सय ४६ उद्योगहरु दर्ता भएको तथ्यांक छ । गत आवबाट कार्यालयले ५ लाख देखि ५ करोड स्थिर पूंँजी भएका उद्योग दर्ता गर्दै आएको छ भने ५ लाख भन्दा कम स्थिर पूंँजी भएका उद्योग स्थानीय पालिकामा दर्ता हुने गरेको छ ।
५५ अर्ब बराबरको बार्षिक क्षमता उत्पादन जिल्लामा हालसम्म सञ्चालित १२ हजार ५सय ४६ वटा उद्योगहरुको बार्षिक क्षमता उत्पादन ५५ अर्ब भन्दा माथि रहेको छ । कार्यालयले दिएको तथ्यांक अनुसार ती सबै उद्योगहरुको बार्षिक उत्पादन क्षमता ५५अर्ब ४८ करोड ९४ लाख २९ हजार रुपैंया रकम बराबर रहेको छ ।
