न्यूज अपडेट संवाददाता
सुनसरी, १३ भदौ
चार दिनदेखि परेको अविरल वर्षाका कारण सप्तकोशी नदीमा पानीको बहाव यो वर्षकै उच्च मापन गरिएको छ । कोशी पहाडी भेगहरूमा वर्षा अझै नरोकिएको कारण नदीको बहाव उच्च हुँदा श्रीलंका टापु र गरैया टापुमा स्पर कटान हुन थालेको छ ।
यस अघि पनि कोशीले निरन्तर टापुमा रहेको २ स्पर कटान तिब्र बनाएको थियो । स्थानीय प्रशासनले रोकथामका लागि सामान्य छेकबार लगाए पनि पानीको बहावले भत्काएर पुनः कटान थालेको हो । कोशीले स्पर कटान गर्दै बाडी गाउँ पसेपछि त्यस क्षेत्रका करिब ४० घर परिवार बिस्थापित बनेका छन् ।
नेपाल प्रहरी, नेपाली सेना तथा सशस्त्र प्रहरीको टोलीले स्थानीयहरूलाइ सुरक्षित स्थानमा सार्न थालेको छ । नदीले स्पर कटान गरेको सुचना पाएपछि सुनसरीका प्रमुख जिल्ला अधिकारी उमेश कुमार ढकालको नेतृत्वमा बिशेषज्ञको टोलीले अनुगमन गर्दै जोखिम क्षेत्रको पहिचान गरी उनीहरूको उद्धारमा सेना परिचालन गरेको हो ।
कोशी आसपासका क्षेत्रमा बसोबास गर्ने स्थानीयहरूलाई प्रहरीले सुरक्षित स्थानमा सर्न अनुरोध गरेको छ भने स्पर कटान भएका श्रीलंका टापु र गरैया टापुका स्थानीयहरूलाई उद्धार गरी सुरक्षित ठाउँमा लगिएको छ । नदीले आइतबारदेखि नै गरैया टापुको डिल भत्काउन शुरू गरेको थियो । दिउँसो नदी गाउँ पसेपछि प्रहरीले स्थानीयहरूलाई उद्धार गरेको हो ।
नदीबाट मानवीय क्षति हुन नदिन कोशी आसपास क्षेत्रमा साइरन सहितको नेपाली सेनाको टोली खटाइएको सुनसरीको प्रमुख जिल्ला अधिकारी उमेश कुमार ढकालले बताए । कोशीले स्पर कटान गरेको क्षेत्रमा रोकथामका लागि प्रयास भइरहेको छ भने नदीले क्षति पुर्याएको क्षेत्रमा स्थानीयहरुको उद्धारका लागि तिनै तहका सुरक्षाकर्मीहरु परिचालन गरिएको ढकालले बताए ।
यसै बिच सप्तकोशीमा पानीको बहाव यो वर्षकै उच्च मापन गरिएको छ । पछिल्लो मापन अनुसार सप्तकोशीमा पानीको वहाव २ लाख ५७ हजार ७ सय ९० क्यूसेक प्रतिसेकेण्ड पुगेको कोशी ब्यारेक कन्ट्रोल रूमले जनाएको छ । पानीको बहाव उच्च बने संगै खतराको संकेत स्वरूप कोशीमा रातो बत्ति बालिएको छ भने जोखिम कम गर्न ३५ वटा ढोका खोलिएको छ ।
