न्यूज अपडेट
चितवन, १३ भदौ
जिल्ला प्रशासन कार्यालय चितवनले दोस्रोपटक एक साता निषेधाज्ञा थप गर्ने निर्णय गरेको छ ।
दोस्रो चरणको निषेधाज्ञाको शुक्रबार अन्तिम दिन भदौ १९ गतेसम्मको लागि निषेधाज्ञा थप गर्ने निर्णय गरेको हो । तर यो पटक थपिएको निशेधाज्ञा केही खुकुलो बनाइने निर्णय भएको छ ।
चितवनमा कोरोना संक्रमणको जोखिम र त्रास थप बढ्दै गएकाले निषेधाज्ञाको अवधि बढाउनु पर्ने आवश्यक भएको सहायक प्रमुख जिल्ला अधिकारी नेत्र शर्माले जानकारी दिए । उनका अनुसार अत्यावश्यक सेवा अन्तर्गत बैंक तथा वित्तीय संस्था र अन्य केही सेवालाई भने केही खुकुलो बनाइने भएको हो ।
व्यवसायीहरु र अन्य नागरिकबाट गुनासो आएकाले बैंक तथा वित्तीय संस्था, केही खुकुलो बनाउने निर्णय भएको शर्माले बताए । साथै उद्योग धन्दा भित्र निश्चित स्थानमा क्वारेन्टीनको व्यवस्था गरी सञ्चालन तथा आवत जावत गर्न सकिने र कृषिजन्य ढुवानी, खानेपानी, बिजुली, इन्टेरनेट लगायतका सवारीसाधनलाई खुकुलो बनाइने निर्णय गरिएको छ ।
चितवन प्रशासनले पहिलो चरणमा साउन ३० गतेदेखि लागू हुने गरी भरतपुर महानगरपालिकामा निषेधाज्ञा जारी गरेको थियो । त्यसपछि साउन ३२ रातिदेखि भदौं ५ गतेसम्मका लागि माडी नगरपालिका बाहेक सबै स्थानीय तहमा निषेधाज्ञा जारी गरेको थियो । यसभन्दा अघि प्रशासनले भदौं ६ गतेदेखि शुक्रबार १२ गते रातिसम्म लागु हुनेगरी जिल्लाभरी नै निषेधाज्ञा थप गरेको थियो ।
