न्यूज अपडेट
भक्तपुर, १२ भदाै
कोभिड–१९ संक्रमित भएको भन्दै एकै घरमा बस्दै आएका चौध जना व्यक्तिलाई स्थानीयले जबरजस्ती घरबाट निकाली आइसोलेसन केन्द्रमा पठाएपछि जबरजस्ती गर्ने व्यक्तिहरूमाथि प्रहरीले कारबाही थालेको छ । मध्यपुर थिमि नगरपालिका वडा नं ९ मा एउटै घरमा बस्ने केही व्यक्तिमा कोभिड–१९ पुष्टि भए पछि सो घरमा बस्ने सबै चौध जना व्यक्तिलाई उनीहरूको इच्छाविपरीत जबरजस्ती चाँगुनारायण नपाको खरिपाटीस्थित आइसोलेसन केन्द्रमा पठाइएको थियो । यसरी धपाइएकाहरूमध्ये चार दिनकी सुत्केरीदेखि ७५ वर्षकी ज्येष्ठ नागरिक समेत रहेको बताइएको छ । घरमै सुरक्षित रूपमा होम आइसोलेसनमा बस्ने भन्दा पनि नमानेर स्थानीय केही मानिसले उनीहरूलाई त्यहा“ बस्न नदिने भनी दबाब दिएका थिए । बस्दै आएको घरबाट निकालिए पछि उनीहरू सबै खरिपाटीको आइसोलेसन केन्द्रमा पुगेका थिए ।
कोरोनाका संक्रमितमाथि यस्तो जबरजस्ती भएको थाहा पाए पछि प्रहरीले घटनाबारे अनुसन्धान थालेको महानगरीय प्रहरी परिसर भक्तपुरका एसपी तारा थापाले बताए ।
“घरबाट निकालिएका सबै व्यक्तिलाई उनीहरू बस्दै आएकै घरमा फर्काउने काम भइरहेको छ”, उनले भने ।
प्रहरीले जबरजस्ती गर्ने व्यक्तिहरू को को हुन् भनी खोजी भइरहेको बताएको छ ।