भक्तपुर नगरपालिकाको ७३ औं स्थापना दिवसमा ख्वप अस्पतालको नया“ भवनको उद्घाटन

न्यूज अपडेट संवाददाता
भक्तपुर, २ पुस

भक्तपुर नगरपालिकाको ७३ औं स्थापना दिवसको उपलक्ष्यमा भक्तपुर नपाद्वारा सञ्चालित ख्वप अस्पतालको नया“ भवन उद्घाटन कार्यक्रम शनिवार भक्तपुर च्याम्हासिंहस्थित अस्पताल प्राङ्गणमा सम्पन्न भएको छ । ख्वप अस्पतालको नवनिर्मित भवनको उद्घाटन नेपाल मजदुर किसान पार्टीका अध्यक्ष एवम् वरिष्ठ राजनीतिज्ञ नारायणमान बिजुक्छें (रोहित)ले गरेको थियो । सोही क्रममा अध्यक्ष बिजुक्छेंले भक्तपुर नपाबाट प्रकाशित कोभिड नियन्त्रणमा भक्तपुर नगरपालिका नामक पुस्तक विमोचन गरे ।

कार्यक्रममा बोल्दै अध्यक्ष बिजुक्छेँले स्थानीय निकायलाई स्वायत्तता र विकेन्द्रीकरणको अधिकार दिने हो भने प्रदेश सरकारको आवश्यकता नरहेको बताए । दुर्गम ठाउँहरुमा स्थानीय निकायलाई अधिकार सम्पन्न बनाई सक्रिय रुपमा काम गर्न सकेको खण्डमा सरकारको आधा काम सम्पन्न हुने बताउँदै उनले जनप्रतिनिधि र राजनीतिक कार्यकर्ताले निःस्वार्थ रुपमा देश र जनताको सेवामा एकढिक्का हुन आवश्यक भएको औंल्याए ।

देशको परिस्थिति निकै विकराल बन्दै गइरहेकोमा चिन्ता व्यक्त गर्दै उनले भारतको प्रभाव नेपालमा बढिरहँदा नेपालको अवस्था झन् झन् नाजुक बन्दै गएको उनले बताए ।
नेपालमा दिल्लीको प्रभाव बढ्दै जाँदा नेपालमा राजनीतिक अस्थिरता बढ्दै गएको बताउँदै अध्यक्ष बिजुक्छेंले नेपालमा रसायनिक मल कारखाना स्थापना गर्न पनि भारतकै सहयोगमा हुनुपर्ने अवस्था आउनु देशको लागि घातक भएको बताए ।
न्याय प्रशासनलाई राजनीतिबाट अलग राख्ने कुरा आफैमा गलत भएको औंल्याउँदै उनले नेपालको कार्यपालिका र विधानपालिकामा समेत भारतको छायाँ परेको हुँदा संघर्षको निम्ति देशभक्त जनता एकजुट हुनुपर्ने आवश्यकता औंल्याए ।
नेपाल मजदुर किसान पार्टीका सचिव एवं संघीय सांसद प्रेम सुवालले स्वास्थ्य मन्त्रालयले ख्वप अस्पताल स्वीकृतिमा ढिलाइ गरेका कारण ख्वप अस्पताल सञ्चालनमा ढिलाइ भएको बताए ।

ख्वप अस्पतालले जनतालाई राम्रो स्वास्थ्य उपचार दिनेमा विश्वास व्यक्त गदै उनले सरकारी अस्पताल राम्रो भए मात्र गरिब जनताले सहज रुपमा स्वास्थ्य उपचारमा पहुँच पुग्ने बताए ।
क्यान्सर रोगको उपचारमा प्रयोग हुने औषधी उपलब्ध नहुँदा धेरै बिरामीले अकालमा ज्यान गुमाएकोतर्फ सरकारको ध्यानाकर्षण गराउँदै उनले विदेशबाट ल्याउनुपर्ने औषधी सरकारले तत्काल ल्याउन आवश्यक पहल गर्नुपर्ने बताए ।
कार्यक्रमका सभापति एवम् भक्तपुर नगरपालिकाका प्रमुख सुनिल प्रजापतिले भक्तपुर नपाले निर्वाचन घोषणापत्रमार्फत स्वास्थ्य क्षेत्रमा ‘ख्वप अस्पताललाई सय शैय्याको सुविधासम्पन्न अस्पतालको रुपमा विकास गर्ने, वडा वडामा स्वास्थ्य केन्द्रहरुको विस्तार गर्ने र विशेषज्ञहरुमार्फत नियमित स्वास्थ्य शिविरहरु सञ्चालन गर्ने’ लगायतका प्रतिबद्धताअनुरुप कार्यहरु गर्दै आइरहेको बताए ।

२०३८ सालदेखि जनस्वास्थ्य केन्द्रको रुपमा सञ्चालित च्याम्हासिंहस्थित स्वास्थ्य केन्द्रलाई २०७८ साल वैशाख १७ गतेदेखि विधिवत रुपमा ख्वप अस्पतालको रुपमा सञ्चालनमा ल्याएको अवगत गराउँदै प्रमुख प्रजापतिले जनताको साथ र सहयोग भए हरेक क्षेत्रमा सफलता हासिल गर्न सम्भव छ भन्ने एउटा उदाहरणको रुपमा भक्तपुर नगरपालिकाले काम गर्दै आएको स्पष्ट पारे ।
उनले सरकारी अस्पतालहरुमा सुधार नहुँदा र बिरामीहरु स्वास्थ्य उपचारको लागि निजी अस्पतालहरुमा गइरहनुपर्ने बाध्यताको अन्त्य नभएसम्म जनता स्वास्थ्यकै कारण घरखेत बेच्न बाध्य हुनुपर्ने र ऋणको पासोमा परिरहने यथार्थ प्रस्तुत गरे ।

नेमकिपा बागमती प्रदेशसभा सदस्य सुरेन्द्रराज गोसाईले नेतृत्व राम्रो भएको खण्डमा शिक्षा, स्वास्थ्यलगायतका क्षेत्रमा उल्लेखनीय काम गर्न सम्भव छ भन्ने उदाहरण भक्तपुर नपाले देखाएको बताउँदै नेमकिपाको लामो राजनीतिक जगकै कारण
भक्तपुर आजको स्थितिमा पुगेको यथार्थबोध नयाँ पुस्तामा गराउनुपर्ने बताए ।
ख्वप अस्पताललाई १०० शैय्यामा स्तरोन्नति गर्न गरेको निरन्तरको संघर्षकै कारण आज यो उपलब्धी हासिल भएको बताउँदै सांसद गोसाईले स्वास्थ्य क्षेत्रबाट जनताको जीवनमा निःस्वार्थ सेवा गर्ने भावना ख्वप अस्पतालमा हुनुपर्ने बताउए ।
भक्तपुर नगरपालिकाका उपप्रमुख रजनी जोशीले भक्तपुर नपा देशभरिकै उत्कृष्ट नगरपालिकाको रुपमा परिचित गर्न यहाँका अग्रज, जनप्रतिनिधि, नगरबासी, बुद्धिजीवी, पत्रकारलगायतको भूमिका उल्लेखनीय रहेको बताए ।
भक्तपुर नगरलाई शिक्षित र सुन्दर नगरको रुपमा विकास गर्ने लक्ष्य बोकेको भक्तपुर नपाले कोभिड महामारीबाट जोगाउन जनतासँग हातेमालो गर्दै रोग नियन्त्रण र रोकथाममा लागि परेको उनले बताए ।
जि.प्र.का. भक्तपुरका प्रमुख जिल्ला अधिकारी रुद्रादेवी शर्माले ख्वप अस्पताल उद्घाटन नगरबासीहरुको निम्ति गौरवपूर्ण समय भएको बताउँदै गुणस्तरीय र सर्वसुलभ स्वास्थ्यको लागि भक्तपुर नपाको प्रयास प्रशंसनीय भएको बताए ।
सानो जिल्ला भएर पनि भक्तपुरमा संघ, प्रदेशको अस्पताल रहेको र नगरपालिकाले सञ्चालन गर्ने ख्वप अस्पतालबाट भक्तपुर लगायत देशभरका जनताले स्वास्थ्य उपचार सहज रुपमा पाउने उनले बताए ।
भक्तपुर क्यान्सर अस्पताल, भक्तपुरका कार्यकारी निर्देशक प्रा.डा. विष्णुदत्त पौडेलले कोभिड नियन्त्रणमा भक्तपुर नपाले राम्रो काम गरेको बताउनुहुँदै भक्तपुर क्यान्सर अस्पतालमा डी.एम. अन्कोलोजीको कार्यक्रम सञ्चालन भइरहेको जानकारी गराउनुभयो ।
भक्तपुर अस्पतालका मे.सु डा. सुमित्रा गौतमले भक्तपुर अस्पताललाई नमूना अस्पतालको रुपमा विकास गर्न भक्तपुर नपाले सहयोग गर्दै आएको चर्चा गर्दै ख्वप अस्पतालको प्रगतिको कामना गरे ।
कार्यक्रममा स्वास्थ्य कार्यालय, भक्तपुरका प्रमुख कृष्णबहादुर मिजारले भक्तपुर नपा आफ्नो नगरबासीहरुको सेवाको निम्ति दत्तचित्त भएर लागिरहेको बताउँदै अस्पतालले स्वास्थ्य सुविधाहरु थप गर्दै लानुपर्ने आवश्यकता रहेको बताए ।
शहीद धर्मभक्त राष्ट्रिय प्रत्यारोपण केन्द्र, भक्तपुरका कार्यकारी निर्देशक डा. पुकार चन्द्र श्रेष्ठले नेपाल सरकारको मुख नताकी जनताको सहयोगबाट निर्मित अक्सिजन प्लान्ट निर्माण गरी नगरबासीहरुलाई कोभिडमा गरेको सेवा सराहनीय भएको उल्लेख गरे ।
शहीद धर्मभक्त राष्ट्रिय प्रत्यारोपण केन्द्रले १३० जनाभन्दा बढीको दिनहुँ रुपमा डायलासिस गर्दै आइरहेको, ७७ जिल्लाका मृगौलाका बिरामीहरु यहाँ उपचार गर्न आउने गरेको तथ्यांक प्रस्तुत गर्दै उनले भक्तपुर नपाबाट सञ्चालित ख्वप अस्पतालबाट निःशुल्क डायलासिसको सेवा सुरु गर्न आफू प्रतिबद्ध रहेको बताए ।

कार्यक्रममा ख्वप अस्पतालका डा. रत्नसुन्दर लासिवाले ख्वप अस्पतालको प्रगति प्रतिवेदन र ख्वप अस्पताल भवन निर्माण आयोजना प्रमुख विजय राम कोजूले ख्वप अस्पताल भवन निर्माणको कार्य प्रगति आदिबारे प्रष्ट पारे भने भक्तपुर नपा वडा नं. ७ का वडाध्यक्ष उकेश कवांले पनि बोलेको थियो ।
भक्तपुर नगरपालिकाको वार्षिकोत्सवकै अवसर पारेर आयोजित उक्त कार्यक्रमका प्रमुख अतिथि बिजुक्छेँले भक्तपुर नपाको प्रकोप व्यवस्थापन कोष र ख्वप अस्पतालमा अक्सिजन प्लान्ट स्थापना गर्न रु. ५ लाखभन्दा बढी आर्थिक सहयोग गर्ने संघसंस्थालाई कदर पत्र वितरण गर्नुभएको थियो ।
सोही क्रममा कार्यक्रमका अतिथि सांसद गोसाईले कोभिड १९ रोकथाम, नियन्त्रण र उपचार कार्यमा संलग्न भई सहयोग गर्ने कर्मचारीहरुलाई कदर पत्र वितरण गर्नुभएको थियो भने कार्यक्रमका सभापति प्रमुख प्रजापतिले भक्तपुर नगरपालिकाका उत्कृष्ट १० जना कर्मचारीलाई नगद पुरस्कार प्रदान गरेको थियो ।
औपचारिक कार्यक्रमपश्चात कार्यक्रमका प्रमुख अतिथि तथा अतिथिगणहरुले ख्वप अस्पताल भवन, ब्रम्हायणीस्थित ख्वप अस्पताल कोभिड युनिट र छात्ती पुनःस्थापना केन्द्रको स्थलगत अवलोकन गरेको थियो ।
ख्वप अस्पताल भवन निर्माणको जम्मा लागत ५० करोड पुगेको अस्पताल स्रोतले बताएको छ ।