न्यूज अपडेट
काठमाडाैं, ३२ साउन
गत २४ घण्टामा देशभर तीन जना कोरोना संक्रमितको मृत्यु भएको छ। यो सँगै नेपालमा कोरोना संक्रमित मृतकको संख्या १ सय २ पुगेको छ।
कपिलवस्तु, पर्सा र धनुषाका १÷१ जना संक्रमितको मृत्यु भएको स्वास्थ्य तथा जनसंख्या मन्त्रालयले जनाएको छ।
कपिलवस्तुको मायादेवी गाउँपालिका वडा नं ७ का ४० वर्षीय एक पुरुषको उपचारको क्रममा शनिबार मृत्यु भएको छ । ज्वरो, खोकी तथा श्वास प्रश्वासमा समस्या देखिएपनि उनी साउन २९ गते लुम्बिनी प्रादेशिक अस्पताल भर्ना भएका थिए।
कोरोना परीक्षणका लागि उनको सोही दिन स्वाब संकलन गरिएको थियो । उनको शनिबार नै कोरोना पुष्टि भएको हो । उनी तीन महिना अघि भारतबाट आई क्वारेन्टाइनमा बसेको मन्त्रालयले जनाएको छ । मन्त्रालयका अनुसार त्यो बेला गरिएको परीक्षणमा कोरोना नेगेटिभ आएको थियो।
यस्तै, पर्साको वीरगञ्ज महानगरपालिका वडा नं १२ का ६० वर्षीय पुरुषको साउन ३० गते मृत्यु भएको छ । श्वासप्रश्वासमा समस्या आएपछि उनी साउन २४ गते नारायणी अस्थाई कोरोना अस्पताल गण्डकमा भर्ना भएको मन्त्रालयले जनाएको छ।
उनको अस्पताल भर्ना भएकै दिन कोरोना पुष्टि भएको थियो । मन्त्रालयका अनुसार उनी मधुमेह, उच्च रक्तचाप तथा पक्षघातका बिरामी समेत थिए।
धुनषा जिल्लामा पनि कोरोना संक्रमित एक पुरुषको साउन २९ गते मृत्यु भएको छ । धनुषाको जनकनन्दनी गाउँपालिका वडा नं ४ का ५० वर्षीय पुरुषको थप उपचारको लागि लैजादै गर्दा बाटोमै मृत्यु भएको हो।
श्वासप्रश्वासमा समस्या देखिएपछि उनलाई साउन २९ गते प्रादेशिक अस्पताल जनकपुरमा भर्ना गरिएको थियो । थप उपचारका लागि काठमाडौं रेफर गरेकोमा उनको बाटोमै मृत्यु भएको मन्त्रालयले जनाएको छ। उनको साउन २७ गते स्वाब संकलन गरी जाँच गर्दा साउन २९ मा कोरोना पुष्टि भएको हो । उनमा मुटुसम्बन्धी समस्या रहेको मन्त्रालयले जनाएको छ।
१ सय २ मृतकमध्ये ८० पुरुष र २२ महिला छन् । सबैभन्दा धेरै प्रदेश २ मा कोरोना संक्रमितको मृत्यु भएको छ । प्रदेश २ मा मात्र ३३ पुरुष र ११ महिला गरी ४४ जना संक्रमितको मृत्यु भएको मन्त्रालयको तथ्यांक छ।
बागमतीमा १८, प्रदेश ५ मा १३, प्रदेश १ मा ९, सुदूरपश्चिममा ८, गण्डकीमा ६ र कर्णालीमा ४ जना संक्रमितको मृत्यु भएको छ।