न्यूज अपडेट
भक्तपुर, २४ असार
नेपाल मजदुर किसान पार्टीको भातृ संगठन नेपाल क्रान्तिकारी विद्यार्थी संघले निजी विद्यालयहरुले विना पठनपाठन शुल्क उठाएकोमा ध्यानाकर्षण गरेको छ । कोभिड–१९ को महामारीको कारण संक्रमणमा रहेका नेपाली जनताले सरकारको बन्दाबन्दी (लकडाउन) लाई पूर्णरुपमा साथ दिइरहेको अवस्थामा निजी विद्यालयबाट यसरी शुल्क उठाउन नहुने संघले ठहर गरेको छ ।
संघले लकडाउनबाट प्रभावित शिक्षा क्षेत्रका शिक्षक कर्मचारीको पारिश्रमिकको लागि सरकारले क्षतिपूर्ति दिनुपर्ने बताएको छ । त्यस्तै अनलाइन कक्षाको लागि सम्पूर्ण विद्यार्थीहरूलाई इन्टरनेट प्रविधिको सेवा सजिलै उपभोग पाउने गरी व्यवस्था गर्न संघले नेपाल सरकारसँग माग गरेको छ । गरिब विद्यार्थी अनलाइन कक्षाबाट बंचित हुनुपर्ने वर्तमान अवस्थाको अन्त्य हुनुपर्ने नेक्राविसंघका अध्यक्ष सविन ख्याजूद्वारा बुधबार जारी प्रेषित विज्ञप्तिमा उल्लेख छ ।
नेकपा सरकारले आ.व. २०७७÷७८ को बजेटमा प्रस्तुत गरेको सामुदायिक विद्यालयहरूको भौतिक सुधारको जिम्मा निजी विद्यालयहरूलाई दिने कार्यक्रम पूर्णतः नवउदारवादी आर्थिक कार्यक्रम भएको बताउँदै सरकारले शिक्षामा थोरै बजेट विनियोजन गर्ने र विद्यार्थीहरूलाई शिक्षाको अवसरवाट टाढा राख्ने सरकारको पञ्चायती शैलीको संघले आपत्ति जनाएको छ । शैक्षिक क्षेत्रमा निजी र सार्वजनिकजस्ता द्वैध शिक्षा नीति अन्त्य गरी माध्यमिक शिक्षा तथा विश्वविद्यालय शिक्षा निःशुल्क गरी श्रमसँग जोडिएको समाजवादी शिक्षा व्यवस्था लागू गर्न संघले माग गरेको छ ।
