न्यूज अपडेट
भक्तपुर, २१ फागुन
वागीश्वरी माध्यमिक विद्यालयमा कक्षा १२ मा अध्ययनरत नवागन्तुक विद्यार्थीहरुले कक्षा ११ मा विज्ञान, मानविकी तथा शिक्षा सङ्कायमा अध्ययनरत नवागन्तुक विद्यार्थीहरुलाई शुक्रबार ब्रम्हायणीस्थानमा स्वागत गरेको छ ।
कार्यक्रमका प्रमुख अतिथि विद्यालयका प्रधानाध्यापक कृष्णप्रसाद धन्छाले विद्यार्थीहरु देशको कर्णधार भएकोले सरकारद्वारा गरिने देशविरोध कदमको विरोध गर्न तयार हुनुपर्ने बताए ।
वागीश्वरी आत्मनिर्भरताको सिद्धान्तमा विश्वास गर्ने शैक्षिक संस्था भएको बताउँदै उनले विद्यार्थीहरुले पनि पढाइसँगै देश र जनताको सेवा गर्ने भावना आत्मसात गर्नुपर्ने बताए ।
वागीश्वरी कलेजका प्राचार्य धनकुमार श्रेष्ठले विद्यार्थीहरु शुरुदेखि नै अध्ययनमा मिहिनेती हुनुपर्ने बताउँदै वागीश्वरीको प्रतिभाका कारण आज देशभर परिचय स्थापित भएको औल्याए ।
विद्यालयका +२ संयोजक ज्ञानसागर प्रजापतिले उच्च शिक्षा अध्ययनको थलोको रुपमा वागीश्वरीलाई चुनेकोमा धन्यवाद व्यक्त गर्दै वागीश्वरी माविले आफूसँगसँगै आफूभन्दा कमजोर विद्यालयलाई सुधार गरी निरन्तर सहकार्य गरिरहेको बताए ।
विद्यालयका सहायक प्रअद्वय कृष्णप्रसाद कर्माचार्य र उकेश सुवालले वागीश्वरीबाट उत्तीर्ण गरेका विद्यार्थीहरुले विभिन्न क्षेत्रमा राम्रो कार्य गरिरहेको दृष्टान्त प्रस्तुत गर्दै विद्यार्थीहरुले विद्यालयबाट सञ्चालित परीक्षालाई अनुशासित र मर्यादित भएर दिनुपर्ने स्पष्ट पारे ।
कार्यक्रममा प्रा.डा. सिद्धिवीर कर्माचार्य, शिक्षिका निरु ताल्चाभडेल र विद्यार्थी रितृष्णा दुवालले पनि बोलेको थियो ।
कार्यक्रममा विद्यार्थीहरुले सांस्कृतिक गतिविधिहरु समेत देखाएको थियो ।
