उनले थपे । राजनीति गुलाबको ओछ्यानजस्तो आरामदायी जीवन नभई तरबारको धारमा हिँड्नुजस्तो जोखिमपूर्ण रहेको चर्चा गर्दै सचिव सुवालले राजनीतिमा लागेकाहरूले जस्तोसुकै त्याग गर्न पनि तयार हुनु जरुरी रहेको बताए ।
उनले भने, “धन–सम्पत्ति भएमात्र प्रतिष्ठा हुने कुरा झूट हो, प्रतिष्ठाको लागि संस्कार आवश्यक छ । सिद्धान्तमा आधारित नभएको र भागबन्डामा केन्द्रित भएको हुँदा एमाले र माओवादीको दुईतिहाइ मतको सरकार असफल भयो ।”
प्रतिनिधिसभा पुनःस्थापनाले ‘संविधान र लोकतन्त्रको संरक्षण गरेको’ कुरा पञ्चायती भाषा भएको उल्लेख गर्दै सचिव सुवालले निर्वाचनलाई अस्वीकार गर्नु प्रतिगमन भएको धारणा राखे।
उनले साँच्चिकै क्रान्ति भएपछि सरकारमा गएर देश र जनताको विरोधमा काम गरेकाहरू फाँसीमा लट्किने बताए।
सचिव सुवालले भने, “सरकारमा गएका राजनीतिक दलहरूमा भारतीय शासक वर्गको प्रभाव बढ्दो छ । भारतकै निर्देशनमा प्रतिनिधिसभा पुनःस्थापना गरिएको समाचार देश र जनताको निम्ति घातक छ ।”
जिल्ला समितिमा निर्वाचित सदस्यहरूले पार्टी प्रकाशन अध्ययन र अन्तरक्रिया चालू राखी जनतालाई राजनीतिकरूपले शिक्षित र सचेत गर्नु जरुरी रहेकोमा उनले जोड दिए।
पार्टीका केन्द्रीय सदस्य एवम् भक्तपुर नगरपालिकाका प्रमुख सुनिल प्रजापतिले सर्वोच्च अदालतले देशको परिस्थितिलाई दृष्टिगत गरी निर्णय र फैसला गर्नुपर्नेमा जोड दिए ।
अहिलेको राजनीतिक परिस्थितिले सांसदहरूको खरिद–बिक्रीको अवस्था आउन सक्ने तर्फ उहाँले सचेत गराए।
सम्मेलनको बन्द सत्रमा नगर समिति, जिल्ला जनवर्गीय समिति, पेशागत सङ्गठन र जिल्ला समितिको साङ्गठनिक प्रतिवेदन प्रस्तुत गरिएको थियो । बन्दसत्रले नारायण महर्जनको अध्यक्षतामा २१ सदस्यीय काठमाडौँ जिल्ला समिति चयन गरेको छ ।
पार्टीका केन्द्रीय सदस्य सनकमान महर्जन, वैकल्पिक केन्द्रीय सदस्य नारायणबहादुर दुवाललगायतका अतिथिहरूले चुनिएका पदाधिकारीहरूलाई बधाई दिएको थियो ।
कार्यक्रममा ख्वप कलेज अफ इन्जिनियरिङका प्राचार्य ई. सुनिल दुवालले पनि प्रशिक्षण दिएको थियो ।
