न्यूज अपडेट
एजेन्सी, २० फागुन
संयुक्त राष्ट्रसंघले म्यानमारमा एक महिना अघिको सैनिक कूपछि कै ‘सबैभन्दा हिंसात्मक दिन’ भनेको बुधबार देशभर कम्तिमा ३८ जना प्रदर्शनकारी मारिएका छन् । म्यानमारका लागि राष्ट्रसंघका दूत क्रिस्टिन स्क्रानर बर्गनरले देशभरबाट स्तब्ध बनाउने भिडियोहरू प्राप्त भइरहेको बताइन् । प्रत्यक्षदर्शीका अनुसार सुरक्षाकर्मीले प्रदर्शनकारीमाथि रबर तथा वास्तविक गोली प्रहार गरेका थिए ।
गत फेब्रुअरी १ मा सेनाले शासन सत्तामा कब्जा जमाएपछि म्यानमारमा दैनिकरूपमा प्रदर्शनहरु भइरहेका छन् । प्रदर्शनकारीले सैनिक शासनको अन्त्यको माग गर्नुका साथै आङ सान सूचीसहित निर्वाचित नेताहरुलाई रिहा गर्न माग गरेका छन् ।
बुधबारको हिंसापछि बेलायतले शुक्रबारका लागि संयुक्त राष्ट्रसंघको सुरक्षा परिषद्को बैठक बोलाएको छ । अमेरिकाले पनि म्यानमारमाथि थप कारवाही गर्ने बताएको छ ।
म्यानमारका छिमेकी राष्ट्रहरुले सेनालाई संयमता अपनाउन आग्रह गरेको भोलिपल्ट नै त्यहाँ ठूलो संख्यामा प्रदर्शनकारीहरू मारिएका हुन् । बर्गनरका अनुसार कू यता कम्तिमा ५० जनाले ज्यान गुमाएका छन् भने सयौँको संख्यामा घाइते भएका छन् ।
उनका अनुसार एउटा भिडियोमा प्रहरीले मेडिकल स्वयंसेवकलाई निर्घात कुटपिट गरिरहेको देख्न सकिन्छ भने अर्कोमा प्रदर्शनकारीमाथि गोली प्रहार भइरहेको देखिन्छ ।
म्यानमारका विभिन्न सहरमा सुरक्षाकर्मीले प्रदर्शनकारीमाथि अन्धाधुन्द गोली प्रहार गरेको रिपोर्टहरु सर्वाजनिक भएका छन् । सेभ द चिल्ड्रेनका अनुसार मारिनेमा दुई १४ र १७ वर्षका किशोर रहेका छन् । त्यस्तै, १९ वर्षीया युवती पनि मारिएकी छन् । मध्य म्यानमारमा रहेको मोनवायामा प्रहरीको गोली लागेर ६ जना मारिएका छन् भने कम्तिमा अन्य ३० जना घाइते रहेको स्थानीय पत्रकारले जानकारी दिएका छन् । एएफपीका अनुसार मिनग्यानमा १० जना घाइते छन् । यता, मन्डालेमा पनि प्रदर्शनकारीहरू मारिएको स्थानीयले जानकारी दिएका छन् ।
यता, सेनाले मृत्युको खबरबारे हालसम्म केही प्रतिक्रिया दिएको छैनन् । अन्तर्राष्ट्रिय समुदायबाट दबाब बढे पनि सेना आफ्नो कदमप्रति प्रतिबद्ध रहेको छ । बर्गनरले सेनाका उप–प्रमुखसँगको संवादमा संयुक्त राष्ट्रसंघले कडा कदम चाल्ने चेतावनी दिँदा ‘हामीले हाम्रो मित्रहरूसँग मात्र हिँड्न जानेका छौँ’ भन्ने प्रतिक्रिया पाएको बताइन् ।
