न्यूज अपडेट
काठमाडाैं, २६ कात्तिक
स्वास्थ्य तथा जनसंख्या मन्त्रालयले सरकारी अस्पतालमा कोरोना परीक्षण निशुल्क गर्ने भएको छ।
मन्त्रालयले सबै अस्पतालमा कोरोना परीक्षण र उपचार सशुल्क गरेपछि सर्वोच्च अदालतमा मुद्धा दायर भएको थियो।
सर्वोच्च अदालत कोरोना परीक्षण र उपचार नि:शुल्क गर्न आदेश दिएपछि मन्त्रालयले निर्णय परिमार्जन गर्दै कोरोनाको लक्षण वा चिन्ह भएका व्यक्तिको परीक्षण र उपचार नि:शुल्क गर्ने निर्णय गरेको हो।
स्वास्थ्य मन्त्रालयका प्रवक्ता डा जागेश्वर गौमतले परीक्षण र उपचारका सूचीकृत प्रयोगशाला वा सरकारी अस्पतालमा कोरोनाका लक्षण देखिएका व्यक्तिको परीक्षण र उपचार निशुल्क गरिने जानकारी दिए।
मन्त्रालयले उल्लेखित लक्षण वा चिन्ह देखिएका व्यक्तिले कुनै बिमा कम्पनीबाट कोरोना बिमा गरेको खण्डमा परीक्षण र उपचार शुल्क बिमा रकमबाट व्यहोरिने जनाएको छ।
प्रवक्ता गौतमले उपचार शुल्क तिर्न सक्षम र योगदान गर्न चाहने व्यक्तिले सशुल्क परीक्षण र उपचार गर्न सक्ने बताए।
