काठमाडौं, १९ असार
नेपालमा मनसुनको प्रवेशको घोषण भएको १३ दिन बितिसक्दा पनि अझै मनसुन पूर्ण सक्रिय भएको छैन जल तथा मौसम पूर्वानुमान महाशाखाले असार ५ गते मनसुन भित्रिएको घोषण गरेका थिए ।
मनसुन सक्रिय नहुँदा देशभर गर्मी बढेको छ । नेपालको पूर्वी क्षेत्र हुँदै भित्रिएको मनसुन अझै पूर्ण सक्रिय हुन ३÷४ दिन लाग्ने जल तथा मौसम पूर्वानुमान महाशाखाले जनाएको छ । न्यून चापीय रेखा मध्य भारतमै रहेकोले मनसुन कमजोर भएको महाशाखाका मौसमविद् राजु प्रधानाङले बताए । उक्त प्रणाली बिस्तारै नेपालसम्म आई पुग्न ३÷४ दिन लाग्नेछ भनी मौसमविद्ले बताए । अहिले मनसुन कमजोर अवस्थामा रहेकाले हल्का र क्षणिक वर्षा मात्रै भएको बताइएको छ ।
तत्काल भारी वर्षाको सम्भावना नरहेकोले मौसम पूर्वानुमान महाशाखाले जनाएको छ । काठमाडौ उपत्यकामा बिहान र साँझपख हल्का वर्षा हुने गरे पनि मध्याहनमा चर्काे घाम लाग्ने र दिउँसो बदली र घाम लाग्ने क्रमले गर्दा उपत्यकामा बढी गर्मी महसुस गरिएको छ । तीन दिनयता काठमाडौ उपत्यकाको अधिकतम तापक्रम ३१ देखि ३२ दशमलव ५ डिग्री सेल्सियससम्म पुगेकोमा आज ३१ दशमलव ८ डिग्री सेल्सियसमा झरेको छ ।
राती देशभर सामान्य बदली रही केही स्थानमा हल्कादेखि मध्यम वर्षाको सम्भावना रहेको मौसम पूर्वानुमान महाशाखाले जनाएको छ । देशभर आंशिकदेखि सामान्य बदली रही धेरैजसो स्थानमा मेघ गर्जनसहित हल्का वर्षाको सम्भावना रहेको छ ।मध्य र पश्चिमको एक दुई स्थानमा भने भारी वर्षाको सम्भावना रहेको बताइएको छ ।
