न्यूज अपडेट संवाददाता
काठमाडाैं, ३० फागुन
चैत महिनामा पनि पुरानै ब्याजदरलाई निरन्तरता दिन सबै बैंकहरु सहमत देखिएका छन्। सबै वाणिज्य बैंकहरुले फागुनकै ब्याजदरलाई निरन्तरता दिएर नयाँ सूचना जारी गर्ने भएका छन्।
ब्याजदर बढाउँदा पनि निक्षेप नआउने भएपछि बैंक तथा वित्तीय संस्थाले चैत महिनाका लागि ब्याजदर स्थिर राख्ने भएका हुन् । यसका लागि आइतबारसम्म वाणिज्य बैंक र विकास बैकका छाता संगठनहरुले औपचारिक निर्णय गरिसकेका छन् ।
फाइनान्स कम्पनीहरुको छाता संगठन नेपाल वित्त कम्पनी संघले पनि आइतबार ब्याजदर नबढाउने निर्णय गर्ने स्रोतले बताएको छ ।
यसरी चैत महिनाका लागि बैंक तथा वित्तीय संस्थाले सोमबार फागुनकै ब्याजदर प्रकाशित गर्ने छन् । जसअनुसार वाणिज्य बैंकहरुको हाल एक वर्षे मुद्दती निक्षेपमा अधिकतम ११.०३ प्रतिशत ब्याजदर तोकिएकाे छ । गत माघको तुलनामा फागुनमा बैंकहरुले मुद्दती निक्षेपको ब्याजदर ०.९८ प्रतिशत विन्दुले बढाएका थिए । यसका आधारमा यही फागुनमा वाणिज्य बैंकहरुमा संस्थागत एक वर्षे मुद्दती निक्षेपको अधिकतम ब्याजदर १०.०३ प्रतिशत र साधारण बचतको ६.०३ प्रतिशत कायम भएको छ । सहमति अनुसार नै बैंकहरुले नयाँ ब्याजदर प्रकाशित गर्ने भएकाले चैत महिनाका लागि पनि निक्षेपकर्ताले उल्लेखित ब्याजदर नै पाउने छन् ।
यस्तै, विकास बैंकहरुले पनि चैत महिनाका लागि एक वर्षे मुद्दती निक्षेपको ब्याजदर अधिकतम ११.५५ प्रतिशतमै स्थिर राख्दै छन् । यो दर फागुनकै हो । फागुन महिनामा फाइनान्स कम्पनीहरुले पनि निक्षेपको ब्याजदर एक प्रतिशत विन्दुले बढाएर ११.७१ प्रतिशत कायम गरेका थिए । उनीहरुले चैतमा पनि त्यही ब्याजदर प्रकाशित गर्ने स्रोतले बताएको छ ।
