काठमाडौँ २४ भाद्र
बंगलादेशमा भइरहेको साफ च्याम्पियनसिपको सेमिफाइनलमा नेपालले माल्दिभ्ससँग खेल्ने भएको छ।
समूह बी अन्तर्गत आइतवार भएको खेलमा भारतले माल्दिभ्सलाई २-० ले पराजित गरेको थियो। जितपछि भारत समूह विजेता बन्यो। तर त्यही समूहमा रहेका अन्य दुई टोली माल्दिभ्स र श्रीलंकाको अंक, गोल अन्तर, हेड टु हेड सबै समान रह्यो।
पहिलो खेलमा श्रीलंका पनि भारतसँग २-० ले नै हारेको थियो। यस्तोमा सेमिफाइनल पुग्ने अर्को टोली छुट्टाउनका लागि आयोजकले टसको निर्णय गर्यो। समूहमा खेल जित्न नसकेपनि माल्दिभ्सले श्रीलंका विरुद्ध टस जित्यो र भाग्यमानी सावित बन्दै अन्तिम चारमा स्थान बनायो।
यता नेपाल समूह ए मा २ जित र एक हारको नतिजासहित गोलअन्तरमा अगाडी रहेर समूह विजेताको हैसियतमा सेमिफाइनल पुगेको हो।
नेपाल र माल्दिभ्स बीचको पहिलो सेमिफाइनल खेल बुधबार नेपाली समयअनुसार दिउँसो ३:४५ बजे हुनेछ। समूह बी को विजेताले समूह ए को उपविजेता पाकिस्तानसँग बुधवारै बेलुका ६:४५ बजे खेल्नेछ।
साफ च्याम्पियनसिप २०१८ : सेमिफाइनल
नेपाल भर्सेस माल्दिभ्स : दिउँसो ३:४५ बजे, बुधवार
भारत भर्सेस पाकिस्तान : बेलुका ६:४५ बजे, बुधवार