न्यूज अपडेट संवाददाता
भक्तपुर, २१ बैशाख
भक्तपुर बचत तथा ऋण सहकारी संस्था लि.ले संस्थाका संस्थापक एवम् सल्लाहकार स्व. रामकृष्ण प्रजापतिको सम्झनामा शुक्रबार संस्थाका समिति, उपसमितिका पदाधिकारी, संस्थापक सदस्यहरु र कर्मचारीहरुबीच श्रद्धाञ्जली सभा गरेको छ ।
स्व.प्रजापतिप्रति एक मिनेट मौनधारण गरी निजको तस्विरमा फूलको गुच्छा चढाई श्रद्धाञ्जली अर्पण गरेको उक्त कार्यक्रममा संस्थाका सल्लाहकार कृष्ण प्रसाद धन्छाले स्व. प्रजापति स्वास्थ्यसँगै शैक्षिक, सामाजिक र आर्थिक क्रियाकलापमा निरन्तर योगदान गर्ने व्यक्तित्वका रुपमा रहेको चर्चा गरे । स्व. प्रजापतिको समाज र देशप्रति गरेको योगदानको कदर गर्दै सबैले उनीबाट सिक्नुपर्ने बताए ।
संस्थाका अध्यक्ष निर्मल प्रजापतिको सभापतित्वमा भएको उक्त कार्यक्रममा संस्थापक अध्यक्ष सत्यनारायण प्रजापति, सल्लाहकार रत्न प्रसाद प्रजापति, सञ्चालक समितिका सचिव जगनाथ प्रजापतिलगायतले स्व. प्रजापतिप्रति श्रद्धाञ्जली अर्पण गरेका थिए ।
