न्यूज अपडेट
भक्तपुर, १५ असोज
वागीश्वरी माध्यमिक विद्यालयमा यस वर्ष कक्षा ११ मा अध्ययन गर्न आएका नवप्रवेशी विद्यार्थीहरुका लागि बिहीबार अनलाइनमार्फत स्वागत तथा अभिमुखीकरण कार्यक्रम भएको छ ।
कार्यक्रमका प्रमुख अतिथि एवं नेपाल मजदुर किसान पार्टीका अध्यक्ष नारायणमान विजुक्छेँले हरेक व्यक्ति एउटा न एउटा विषयमा दक्षता हासिल गर्नुपर्ने बताए । उनले नक्कल गरेर पास हुनुको कुनै अर्थ नभएको र त्यसले देश र जनतालाई हानी पुर्याउने बताए । साथै उनले घुस दिएर गोल्ड मेडल पाउने यो देशमा त्यस्ता व्यक्ति पदमा पुगेमा देश र जनताले ठूलो क्षति व्यहोर्नुपर्ने बताए । विद्यार्थीहरुले थाहा नभएको कुरा स्पष्ट रुपमा शिक्षकसँग सोध्नुपर्ने र बुझेकै हुनुपर्ने उनले बताए । विद्यार्थीहरुले कोर्ष बुकमा मात्र सीमित नभएर अन्य विभिन्न विषयका पुस्तकहरुमा पनि ध्यान दिनुपर्ने उनको भनाइ छ ।
कार्यक्रममा वागीश्वरी कलेज व्यवस्थापन समितिका अध्यक्ष, भक्तपुर नगरपालिकाका प्रमुख सुनिल प्रजापतिले विद्यार्थीहरुको मूल्यांकन आजैबाट शुरु भएको प्रष्ट्याए । उनले देशको आवश्यकता पूरा गर्न सबै विषय त्यत्ति नै महत्वपूर्ण भएको औल्याए । उनले ठेकेदारहरुको मनोमानीका कारण देशले एउटा रासायनिक मल कारखाना पनि स्थापना गर्न नसक्दा मलविनाको धानवाली गर्नुपरेको यथार्थ बताए । साथै ठेकेदार र सीमित व्यापारीहरुको दबावमा परी उपत्यकाका सीमालाई कडाइ गर्न नसक्दा उपत्यकामा कोरोनाको भयावह स्थिति आइपरेको बताउँदै उनले सरकारको अकर्मण्यताकै कारण देश वर्वादीतर्फ गइरहेको स्पष्ट पारे । उनले राजनीतिशास्त्र अध्ययन गर्ने विद्यार्थी कम भएकाले देशमा राजनीतिलाई भ्रष्टाचारको अखडा बनाएको स्पष्ट पारे ।
वागीश्वरी मा.वि.कक्षा ११ र १२ का संयोजक ज्ञानसागर प्रजापतिले विद्यार्थीहरुले एउटा विषयलाई अठोट लिएर पढ्नुपर्ने र विशेषज्ञता हासिल गर्नुपर्ने बताए । उनले सबै संकाय र विषय त्यत्ति नै महत्वपूर्ण भएकाले आफ्नै मेहनतबाट पहिलाको भन्दा ग्रेड वृद्धि गरी पढ्नुपर्ने औल्याए । साथै नयाँ वातावरणमा समायोजित हुन केही समय लागेपनि विना संकोच आफ्नो कुरा विषय शिक्षकहरुसँग राख्नुपर्ने उनको भनाइ छ ।
विद्यालय व्यवस्थापन समितिका अध्यक्ष रविन्द्र ज्याख्वको सभापतित्वमा भएको उक्त कार्यक्रममा उनले विद्यालयको इतिहासबारे स्पष्ट पारे । साथै उनले वर्तमान समयमा पनि वागीश्वरी नमूनाकै रुपमा राख्न नवआगन्तुक विद्यार्थीको भूमिका महत्वपूर्ण हुने बताए । उनले कोरोनो भाइरस संक्रमणकै यो स्थितिमा विद्यार्थीहरुलाई वैकल्पिक प्रविधिको प्रयोग गरी पढाउन लागेको स्पष्ट पारे ।
त्यस्तै वागीश्वरी मा.वि.का प्रधानाध्यापक कृष्ण प्रसाद धन्छाले विद्यालयबारे आफ्नो धारणा राख्दै विद्यार्थीहरुलाई नयाँ जोश जाँगरका साथ अघि बढ्न जोड दिए । विद्यार्थीहरुले आलोचनात्मक सोचको विकास गर्नुपर्ने, सृजनात्मक हुनुपर्ने, एकआपसमा सञ्चार भइरहनुपर्ने र सहयोगात्मक भावनाका साथ अघि बढ्नुपर्ने उनको भनाइ छ । कार्यक्रममा सहायक प्रधानाध्यापक कृष्ण प्रसाद कर्मचार्यले पनि विद्यार्थीहरुलाई स्वागत गरेको थियो ।
विद्यालयमा बिहीवार विहान व्यवस्थापन, मानविकी र शिक्षा संकायतर्फका र दिउँसो विज्ञान संकायका विद्यार्थीहरुलाई अभिमुखीकरण गरेका थिए ।