भक्तपुर, ६ असोज
भक्तपुर दरबार स्वाक्वर अवलोकनमा आउने पर्यटकका लागि आकर्षणको केन्द्र बन्दै आइरहेको गोल्डेन गेट संरक्षणको अभावमा जीर्ण बन्दै गएको छ । पछिल्लो समयमा मूर्तिमा प्वाल परेर कुरुप देखिएपछि गोल्डेन गेटको सुन्दरता हराएको यहाँ अवलोकन गर्न आएका पर्यटकले समेत बताउँने गर्दछन् ।भक्तपुर दरबार स्क्वायरस्थित सुनको ढोका (गोल्डेन गेट) मा रहेको कलात्मक मूर्ति सम्बन्धित निकायको उदासिनताले कुरुप बन्दै गएको हो । मूर्तिमा भक्तजनले पूजा गर्ने क्रममा सिन्दूर अबिर लगाउँदा मूर्ति खिइएर प्वाल परेपछि मूर्ति कुरुप बनेको स्थानीयहरुले जानकारी दिए । गोल्डेन गेटको दायाँबायाँ रहेको कलात्मक मूर्तिले ढोकाको सुन्दरता झल्काउने गरेको छ ।ढोकाको दायाँबायाँ रहेको भैरव र कालीको मूर्तिमा प्वाल परेसँगै गोल्डेन गेटको सुन्दरतामा समेत कमी आउन थालेको उनीहरु बताउँछन् । ढोकाको दायाँबायाँ गणेश, कुमार, तलेजुलगायतका देवीदेवताको मूर्ति रहेका छन् । मल्लकालीन गोल्डेन गेट नेपालकै नमूनाका रुपमा रहेको छ । एक सय वर्ष भन्दा बढी समय लगाएर बनाएको गोल्डेन गेट विश्व प्रसिद्ध रहेको छ ।यो गेट मल्ल राजा जगतप्रकाश मल्ल, जितामित्र मल्ल, भूपतिन्द्र मल्ल र रणजीत मल्ल गरी चार पुस्ता लगाएर बनाएको संस्कृतिकर्मीहरु बताउँछन् । दरबार स्वाक्यर परिसरमा रहेको गोल्डेन गेटमा रहेको मूर्ति संरक्षणको अभावमा दिन प्रतिदिन कुरुप बन्दै गइरहेको छ । धातुले निर्माण गरिएका गोल्डेन गेटका मूर्ति मात्र होइन, दरबार स्क्वायर परिसरमा रहेको यक्षेश्वर महादेव, नरसिंह, तलेजु मन्दिरभित्र रहेका ढुङ्गाका मूर्तिसमेत खिएर कुरुप बन्दै गइरहेको छ ।हाम्रो परम्पराअनुसार भगवानलाई पूजा गर्दा स्पर्श गरेर पूजा गर्ने प्रचलनले मूर्ति प्वाल परेको स्थानीय सुन्दर ताम्राकारले भक्तपुरन्युजलाई जानकारी दिए । पूजा गर्ने क्रममा जल चढाएर अबीर लगाउँदा अबीरमा भएको विभिन्न रसायनले मूर्ति खिइएको र त्यसैले प्वाल पर्न थालेको उनको भनाइ रहेको छ ।ऐतिहासिक एवम् पुरातात्विक महत्वका कलात्मक मूर्ति तथा सम्पदा संरक्षणका सम्बन्धित निकायले तुरुन्तै ध्यान पुरयाउनुका साथै समयमै यसको जीर्णोद्धार गर्नुपर्नेमा उनले जोड दिए । मूर्तिमा पूजा नगर्नुभन्दा कसैको धार्मिक आस्थामा चोट पर्न सक्ने हुँदा त्यसतर्फ पनि गम्भीर हुनुपर्ने भन्दै स्थानीयहरुले भगवानप्रति आस्था राख्नेले पनि मूर्तिको महत्व बुझी कसरी त्यसको संरक्षण गर्न सकिन्छ त्यही आधारमा पूजा गर्नुपर्ने बताएका छन् ।पर्यटकले समेत ऐतिहासिक एवम् पुरातात्विक महत्वको सम्पदाको संरक्षण गर्नुपर्ने सल्लाह सुझाव दिने गरेका छन् । भक्तपुरको ऐतिहासिक सम्पदा अवलोकनका लागि भक्तपुर नगरप्रवेश गर्ने पर्यटकले १५ डलर शुल्क तिर्नु पर्दछ । पर्यटकको आकर्षणको केन्द्रबिन्दुको रुपमा रहेको विश्व सम्पदामा सूचीकृत गोल्डेन गेटको संरक्षणमा सम्बन्धित निकायको ध्यान जान सकेको छैन ।सम्पदा संरक्षणको जिम्मा पाएको दरबार हेरचाह तथा संरक्षण कार्यालय भक्तपुर र भक्तपुर नगरपालिकाले भूकम्पले क्षति पुरयाएका सम्पदा पुनःनिर्माण र जीर्णोद्धारमा केन्द्रित हुनुपरेकाले तत्काल गोल्डेन गेटको मूर्ति मर्मत गर्ने योजना नभएको जनाएको छ ।भक्तपुर नगरपालिकाले पुरातत्वबाट अहिलेसम्म गोल्डेन गेटको सम्बन्धमा कुनै आदेश नआएको जनाएको छ । सम्पदा संरक्षणसम्बन्धी पहिलो दायित्व दरबार हेरचाह कार्यालयको भएकाले नगरपालिका स्वयंले कुनै कार्य गर्न नमिल्ने नगरपालिकाले जनाएको छ । उता दरबार हेरचाह तथा संरक्षण कार्यालयले गोल्डेन गेटको संरक्षणका लागि अहिले कुनै कार्यक्रम नभएको जानकारी दिए ।
