ताप्लेजुङ, २५ कार्तिक
साहसिक पदयात्रा क्षेत्रकारुपमा चर्चित कञ्चनजंघा पदमार्गको चेराममा रहेको ‘होटेल ब्लु–सीप’का सञ्चालक दावा छिरिङले २९ असोजको साँझ एक विदेशी नागरिकले पठाएको चिठ्ठी पाए । चिठ्ठीमार्फत् आएको सन्देश थियो, १९ र २० अक्टोवरकालागि चार वटा कोठाको अग्रिम वुकिङ ।’ चेराम र यहाँ आसपासका अन्य हिमाली गोठ (बस्ती)हरुमा यसैगरि खबर आदान प्रदान गरिन्छ ।
पर्यटककालागि ‘पथ–प्रदर्शक’को काम गर्नेहरुले अग्रिम बुकिङका चिठ्ठी ओसार्छन् । दोहोर्याएर आउने विदेशी नागरिकहरु आफैँले पत्र पठाएर होटेल बुकिङ गर्छन् । होटेल सञ्चालक भोटे भन्छन्, विज्ञान र प्रविधिको दुनियाँमा रमाएकाहरु नै यहाँ आउँछन्, तर यहाँ त्यसको झल्को पनि छैन । उनले हिमाली गाउँ बस्ती र गोठहरुमा अहिले पनि चिठीबाटै काम चल्ने गरेको बताए । गाउँमा मोवाइल फोन चल्दैन, त्यसैले सूचना आदानप्रदानकालागि चिठ्ठीकै भर पर्नुपरेको छ, भोटेले भने ।
श्रीजंघा गाउँपालिका–८ मा रहेको चेराम गाउँ ३ हजार ९ सय मिटर उचाईमा पर्छ । चेराम र यहाँ आसपासका तारोङ्दिन र राम्जेर क्षेत्रमा सञ्चारका अन्य माध्यमहरुको पहुँच पुगेको छैन । यालुङ्खाङ गेष्ट हाउसकी पासाङ डोमा शेर्पाका अनुसार ‘गाउँवाट होटेलका रुम र खाना अग्रिम अर्डरकालागि चिठ्ठी आउने गरेका छन् । ‘व्यवसायिक प्रयोजनकालागि मात्रै हैन, घरायसी काम र आफन्तकालागि पनि चिठ्ठी पठाउने गर्छौँ, शेर्पा भन्छिन् ।
पर्यटकको सिजन सुरु भएपछि दैनिकजसो नयाँ–नयाँ मान्छेका नामबाट चिठ्ठी आइरहन्छन् । असोजदेखि मंसिरसम्म र चैतदेखि जेठसम्म पर्यटकले भरिभराउ हुने यस क्षेत्रमा चिठ्ठी पोष्ट गर्न हुलाक सेवा पनि छैन । तर, पदयात्रा गर्ने मानिसहरु र पर्यटन पथप्रदर्शकहरुबाटै चिठ्ठी आदानप्रदान हुने गरेको छ ।
यहाँभन्दा अझै धेरै दुर्गममा समेत टेलिफोन र इन्टरनेटको पहुँच पुगिसक्दा पनि आफुहरु कहाँ सम्बन्धित निकायले सेवा विस्तारमा चासो नदेखाएको स्थानीय गुनासो गर्छन् । मोवाइल र टेलिफोन सेवा उपलब्ध नहुँदा विशेष गरी पर्यटकहरु र स्थानीयलाई समेत असजिलो हुने गरेको होटेल व्यावसायी पासाङ र्शर्पाले बताए ।
नेपालको दोश्रो र विश्वकै तेश्रो अग्लो कञ्चनजंघा हिमाल (८५८६ मिटर) को आधार शिविर क्षेत्र सम्म पर्यटकको बाक्लो आवत्जावत् हुन्छ । पदमार्गको ३ हजार ५ सय मिटरभन्दा माथि चढेपछि टेलिफोनको सुविधा उपलब्ध छैन ।
कतिपय पदयात्रीले आफैँ सेटेलाईटजडित फोन ल्याउँछन्, त्यसबाहेक यहाँ फोनको सुविधा छैन, व्यवसायी शेर्पाले भने । कञ्चनजंघा आधार शिविर क्षेत्रका चेराम, तारोङ्दिन र राम्जेर क्षेत्रमा छ वटा होटल सञ्चालित छन् ।
बाह्र महिनामध्ये करिब सात महिना यहाँका डाँडाकाँडामा आन्तरिक र बाह्य पर्यटकको चहल पहल हुन्छ । बाँकी रहेको समयमा अत्यधिक चिसो हुने भएकाले यहाँका स्थानीयहरु नै तलतिर झर्छन् । यी क्षेत्रका अधिकांश गोठ र होटेलहरु याम्फुदिन गाउँबासीहरुले सन्चालन गरेका छन् । साहसिक पदयात्रा क्षेत्र मानिएको कञ्चनजंघा आधार शिविरसम्म सन्चारको पहुँच पु्यार्उन सके पर्यटन व्यवसाय झन् फष्टाएर जाने स्थानीय दावा शेर्पा बताउँछन् ।