भक्तपुर, १ मंसिर
भक्तपुर नगरपालिका अन्तर्गत सञ्चालित देको–मिवा इतापाके जग्गा एककीरण आयोजनामा जग्गा योगदान प्रतिशतबारे जानकारी भेलाको तेस्रो भेला आइतबार सम्पन्न भयो ।
भेलामा बोल्दै संघीय सांसद एवम् नेपाल मजदुर किसान पार्टीका केन्द्रीय सचिव प्रेम सुवालले कम कटौती, कम लगानी र कम समयमा आवास योजना सम्पन्न गर्ने योजना रहेको बताउँदै आवास योजना पुस्तौं पुस्ताको लागि आवश्यक भएको हुँदा व्यवस्थित रुपमा योजना सञ्चालन गर्नुपर्ने बताए । भक्तपुरको पहिलो व्यवस्थित आवास योजना नगाँचा भएको जानकारी दिदै उनले खुल्ला जग्गाको अभाव हुँदा विपद्को समयमा समस्या हुने हुँदा स्थानीय जनतासँग समन्वय गरी आवास योजना व्यवस्थापन गर्नु नै भेलाको मुख्य उद्देश्य रहेको जानकारी दिए ।
देशको सन्तुलित विकास गर्न र नयाँ पुस्ताको लागि भक्तपुरमा पनि आवास योजना सञ्चालन गरेको बताउनु हुँदै उपत्यकाको खाली जमिन अतिक्रमण गरी आवास योजनामा परिणत हुन सक्ने खतरा बढेको बताए । उनले सार्वजनिक र पर्ति जग्गाहरु अतिक्रमणको चपेटामा परेको हुँदा व्यवस्थित आवास योजनाले पर्ति जग्गा संरक्षणमा समेत टेवा पुग्ने बताए ।
कार्यक्रममा बोल्दै भक्तपुर नगरपालिकाका प्रमुख सुनिल प्रजापतिले काठमाडौँ उपत्यकाको २० प्रतिशत भवनले ओगटेको तथा नेपालको पहिलो आवास योजना राजबिराज भएको जानकारी दिदै जथाभावी भवन र संरचना निर्माण गर्दा खुल्ला क्षेत्रको अभाव हुने भएकोले व्यवस्थित बस्ती विकास गर्न सके नयाँ पुस्तालाई समस्या नहुने बताए ।
तुमुचो दुगुरे र लिबाली आवास योजनाको शिक्षा लिंदै देको–मिवा इतापाके जग्गा एकीकरण आयोजनालाई अझ व्यवस्थित रुपमा सञ्चालन गर्न ढल र आकाशे पानीको लागि छुट्टाछुट्टै पाइप राखिएको, पोखरी सुधार गर्ने अवसर यस आवास सञ्चालनले दिएको उनले जानकारी गराए ।
प्रमुख प्रजापतिले वैज्ञानिक हिसाबले जग्गावालाको हितमा केन्द्रित रहेर योगदान प्रतिशतको आधारमा जग्गा कटौती गरिने जानकारी गराउँदै पुरानो सहर बचाई राख्न तथा नयाँ सहरलाई व्यवस्थित ढंगले अगाडि बढाउन आयोजनाले सहयोग गर्ने बताए ।
कार्यक्रममा वडा नं. ३ का वडाध्यक्ष राजकृष्ण गोरा, वडा नं. २ का वडाध्यक्ष हरिप्रसाद बासुकला र उपभोक्ता समितिका अध्यक्ष तुल्सीराम धुख्वाले पनि बोलेको थियो । भेलामा आयोजना प्रमुख ओमहरि थाले आयोजनाबारे प्रस्तुतिकरण गरेको थियो ।
