न्यूज अपडेट संवाददाता
भक्तपुर, २० फागुन
काठमाडौं उपत्यका खानेपानी लिमिटेड (काउखाली) आयोजना निर्देशनालय, अनामनगरको आयोजनामा शुक्रबार भएको उपत्यकाव्यापी वक्तृत्व कला प्रतियोगितामा वागीश्वरी माध्यमिक विद्यालय प्रथम भएको छ ।
भानु मावि, दरबारमार्गमा सम्पन्न भएको उक्त कार्यक्रममा वागीश्वरी मावि, कक्षा १० की छात्रा आस्था गुमान्जुले प्रथम स्थान हात पारेकी हुन् । ‘फोहर पानीको व्यवस्थापन र नदीनालाको संरक्षणमा हाम्रो दायित्व’ शीर्षकमा भएको उक्त कार्यक्रममा उपत्यकाका ११ वटा विद्यालयहरुले सहभागिता जनाएका थिए ।
पुरस्कृत विद्यालय तथा विद्यार्थीहरुलाई भानु माविका प्रधानाध्यापक शारदा पौडेलले पुरस्कार वितरण गरेको थियो । उक्त कार्यक्रममा वागीश्वरी मावि कक्षा ९ का छात्र अभिनव फुयाँलले पनि भाग लिएको थियो ।