न्यूज अपडेट संवाददाता
भक्तपुर, २८ मंसिर
नेपाल मजदुर किसान पार्टीका अध्यक्ष नारायणमान बिजुक्छेँ (रोहित)ले भक्तपुर नगरपालिकाद्वारा सञ्चालित ख्वप इन्जिनियरिङ कलेजको २२ औं र ख्वप कलेज अफ इन्जिनियरिङको १५ औं वार्षिकोत्सव समारोहको बिहीबार पानसमा दीप प्रज्ज्वलन गरी उद्घाटन गरेको छ ।
कार्यक्रममा बोल्दै अध्यक्ष बिजुक्छेँले देश र जनताको निःस्वार्थ रुपमा सेवा गर्नु नै भक्तपुर नगरपालिकाद्वारा सञ्चालित कलेजहरुको उद्देश्य रहेको बताउँदै विदेशबाट सिकेर आफ्नै मातृभूमिमा काम गर्ने भावनाबाट नयाँ पुस्तालाई प्रेरित गर्नुपर्ने बताए ।
राजनीतिक दलहरु कुनै एक निश्चित सिद्धान्त र विचारबाट सञ्चालन हुने विषय जोड्दै उनले सरकारले माफियाहरुसँग मिलेर शिक्षा र स्वास्थ्यमा ठूलो व्यापार गरिरहेको बताए ।
उनले शिक्षा र स्वास्थ्यमा दलीय भागबण्डा बन्द गर्न जरुरी रहेको बताउँदै देशको शैक्षिक क्षेत्रमा संकटग्रस्त अवस्था निम्तिनुमा विदेशी विश्वविद्यालयहरुको ठूलो प्रभाव रहेको बताए ।
इजरायलले प्यालेष्टाइनमाथि गरिरहेको बर्बर हमलाको विरोधमा नेमकिपाले देशका विभिन्न जिल्ला र शहरहरुमा विरोध ¥याली तथा सभाहरु गरिरहेको बताउँदै अध्यक्ष बिजुक्छेँले अमेरिकी साम्राज्यवादको आडमा इजरायलले प्यालेष्टाइनमाथि गरिरहेको हमलाको विरोधमा संसारका विभिन्न देशहरुमा पनि प्रदर्शनहरु भइरहेको बताए ।
कार्यक्रमका सभापति एवम् भक्तपुर नगरपालिकाका प्रमुख सुनिल प्रजापतिले राष्ट्रिय तथा अन्तर्राष्ट्रिय क्षेत्रमा प्रतिस्पर्धा गर्न सक्ने क्षमतावान र योग्य प्राविधिकहरु तयार गर्ने उद्देश्यले स्थापना भएको ख्वप इन्जिनियरिङ कलेज र ख्वप कलेज अफ इन्जिनियरिङ प्राविधिक क्षेत्रमा दक्ष जनशक्ति उत्पादन गर्ने नेपालकै उत्कुष्ट कलेजको रुपमा विकास भइरहेको बताए ।
शैक्षिक क्षेत्रमा सरकारले राम्रो व्यवस्थापन गर्न नसक्दा विद्यार्थीहरु विदेश पढ्न जाने क्रम बढ्दै गइरहेको बताउँदै उनले विश्वविद्यालयजस्तो प्राज्ञिक क्षेत्रमासमेत बारम्बार बन्द, हड्ताल र तोडफोड, आगजनी जस्ता अराजनैतिक गतिविधि हुनाले पनि विद्यार्थीहरुमा निराशा छाएको बताए ।
भारतले नेपालका ठाउँ ठाउँमा योग केन्द्र, बाल विकास केन्द्र, विद्यालय भवन, रक्त सञ्चार केन्द्र, कृषि तथा पूर्वाधार निर्माणमा सोझै खर्च गर्दै नेपालको सार्वभौमिकता र स्वतन्त्रता माथिको हस्तक्षेपको कार्य गर्दै आएको प्रष्ट पार्दै प्रमुख प्रजापतिले भने ‘विदेशी शक्तिलाई लगानीमा छुट दिनुको अर्थ सरकार विदेशी शक्तिको कठपुतली बन्नु हो ।
बागमती प्रदेशसभा सदस्य सुरेन्द्रराज गोसाइँले शिक्षा, स्वास्थ्य जस्ता जनताका आधारभूत विषयमा निजीकरण र उदाहरीकरणको नीतिले जनताको कहिल्यै हित नहुने बताउँदै जनताको निःस्वार्थ रुपमा सेवा गर्ने उद्देश्यले स्थापना भएका भक्तपुर नपाद्वारा सञ्चालित कलेजबाट देशभरिका विद्यार्थीहरुले सस्तोमा गुणस्तरीय शिक्षा हासिल गर्नु सुखद् पक्ष भएको बताए ।
युवा— विद्यार्थी विदेश पलायन हुनुमा मुख्य जिम्मेवार देशका शासक र विश्वविद्यालयहरु स्वयम् भएको बताउँदै म्यानपावर कम्पनीका दलालहरुबाट देश सञ्चालन भएकै कारण देशले आजको नियति भोग्नुपरेको उनले प्रष्ट पारे ।
युवा—विद्यार्थीविहीन नेपालको विकास कति सम्भव छ भन्ने प्रश्न तड्कारो रहेको बताउँदै सांसद गोसाइँले देशलाई आजको अवस्थामा पुर्याउनुमा शासक दल र कर्मचारीतन्त्र दोषी रहेको बताए ।
प्यालेष्टाइनी जनताप्रति ऐक्यबद्धता जनाउँदै सांसद गोसाइँले न्यायप्रेमी जनताले प्यालेष्टाइनी जनतामाथि भइरहेको नृशंस हत्या, बमबारी र अत्याचारको विरोध गर्नुपर्ने बताए ।
भक्तपुर नगरपालिकाका उपप्रमुख रजनी जोशीले दक्ष जनशक्ति उत्पादनमा भक्तपुरका शैक्षिक संस्थाहरुको ठूलो भूमिका रहेको बताउँदै भक्तपुरको सांस्कृतिक पर्यटन प्रवद्र्धनमा नपाले जोड दिँदै आएको बताए ।
भक्तपुर नपाले सञ्चालन गरेका शैक्षिक संस्थाहरुका कारण भक्तपुरलाई ज्ञानविज्ञानको केन्द्रको रुपमा विकास गर्न मद्दत पुगेको बताउँदै नगरपालिकाले नगरबासीहरुको सामाजिक स्तर सँगसँगै सांस्कृतिक स्तर उकास्न पहल गर्दै आएको बताए ।
त्रिभुवन विश्वविद्यालय इन्जिनियरिङ अध्ययन संस्थानका सहायक डीन सुशिल बज्राचार्यले नेपालमा इन्जिनियरिङ अध्ययन गर्ने विद्यार्थीहरुको संख्या उत्साहजनक रहेको बताउँदै विदेश गएर अध्ययन गर्ने बाध्यतालाई अन्त्य गर्न इन्जिनियरिङ अध्ययन संस्थानले विद्यार्थीको माग र रुचिअनुसारका विभिन्न विषयहरु सञ्चालन गरिरहेको बताए ।
भक्तपुर नगरपालिकाका प्रमुख प्रशासकीय अधिकृत वसन्त भट्टराईले कलेजको उत्तरोत्तर प्रगतिको शुभकामना दिँदै स्वदेशमै गुणस्तरीय प्राविधिक शिक्षा प्रदान गर्ने र देशको लागि आवश्यक दक्ष जनशक्ति उत्पादन गर्ने उद्देश्यले स्थापना भएका कलेजहरु देशकै लागि नमुना भएको बताए ।
कार्यक्रममा ख्वप इन्जिनियरिङ कलेजका प्राचार्य सुजन माकले कलेजको वार्षिक प्रतिवेदन प्रस्तुत गर्दै बि.सं. २०५८ देखि हालसम्ममा स्नातक र स्नातकोत्तर तहमा देशभरिका ४, ८४० विद्यार्थी अध्ययनका लागि भर्ना भइसकेका र हाल ७१ जिल्लाका ९७४ जना विद्यार्थीहरु स्नातक र स्नातकोत्तर तहका विभिन्न कार्यक्रमहरुमा अध्ययन रहेको बताए ।
ख्वप कलेज अफ इन्जिनियरिङका प्राचार्य सुनिल दुवालले कलेजको वार्षिक प्रगति प्रतिवेदन प्रस्तुत गर्दै हालसम्म मनाङ र धनकुटा जिल्ला बाहेक ७५ जिल्लाका २,४२४ जना विद्यार्थीहरुले अध्ययन गरिसकेको र हाल यस कलेजमा ७२ जिल्लाका ७१४ जना विद्यार्थीहरु अध्ययनरत रहेको बताए ।
कार्यक्रममा प्रमुख अतिथि बिजुक्छेँले दुवै कलेजमा १० वर्ष र २० वर्ष सेवा अवधि पूरा गरेका प्राध्यापक तथा प्रयोगशाला÷कर्मचारीहरुलाई नगद पुरस्कारसहित सम्मान गरेको थियो भने अतिथिहरुले कलेजको वार्षिकोत्सवको अवसरमा आयोजित विभिन्न खेलकुद प्रतियोगिताका विजयीहरुलाई मेडल तथा सम्मान पत्र प्रदान गरेको थियो ।