न्यूज अपडेट संवाददाता
भक्तपुर, २५ माघ
नेपाल मजदुर किसान पार्टी, सूर्यमढी प्रा.स.को आयोजनामा मंगलबार ४९ आौं पार्टी स्थापना दिवस मनाइयो ।
कार्यक्रममा नेपाल मजदुर किसान पार्टी केन्द्रीय सदस्य एवं ९ वडा अध्यक्ष रविन्द्र ज्याख्वले नेपालले बेलायती संसदीय व्यवस्थालाई अनुसरण गरेकै कारण सरकारलाई समर्थन गर्ने दल प्रमुख प्रतिपक्षमा बस्न नहुने जिकिर गरे । उनले नेपालले अँगालेको संसदीय व्यवस्था नमान्ने भए चिनीयाँ संसदीय व्यवस्था मान्नुपर्ने, तर काँग्रेसले दुवै नमानिरहेको बताए । उनले किसान आन्दोलनको जग बारामा हुने नेपाल क्रान्तिकारी किसान संघको ऐतिहासिक राष्ट्रिय सम्मेलन भव्य रुपमा सफल पार्न सहभागिताका लागि अनुरोध गरे ।
नेमकिपा भक्तपुर नगर समितिका प्रतिनिधि कृष्ण गोविन्द लाखाले नेपालमा जो कम्युनिष्टको आचरण नै छैन, उसले आफैलाई कम्युनिष्ट भनी दावी गर्नु गलत भएको बताउँदै किसान र मजदुरको समस्याको समाधानसँगै समाजवादसम्म पुग्ने लक्ष्य बोकेको नेपाल मजदुर किसान पार्टीले ४९ वर्षको इतिहास रचेको स्पष्ट पारे । उनले अबको पुस्तालाई सूचना प्रविधियुक्त प्रशिक्षणको आवश्यकता रहेको औल्याए ।
आयोजक समितिको अध्यक्ष दिलभक्त कोजूले सभापतिको आसनबाट बोल्दै नेमकिपाको स्थापनाको आधार नेपाल कम्युुनिष्ट पार्टीभित्र देखेका खोटा विचारको खण्डन र विभिन्न राष्ट्रिय अन्तरराष्ट्रिय आन्दोलनहरु रहेको स्पष्ट पारे । उनले नेमकिपाले मात्रै माक्र्सवाद, लेनीनवाद र माओत्सेतुङ विचारधारालाई अँगिकार गर्दै अगाडि बढेको बताए । कम्युनष्टि घोषणापत्र र नेपालमा यसको कार्यान्वयनबारे स्पष्ट पार्दै उनले विश्व कम्युनिष्ट आन्दोलनका इतिहासबारे अध्ययन गर्न जोड दिए ।
कार्यक्रममा उपाध्यक्ष काशीलाल प्रजापति, सचिव लक्ष्मी प्रसाद कुसीलगायतले नेपाल मजदुर किसान पार्टी र स्थापनाका आधारबारे प्रष्ट्याइएका थिए ।