हुवर फरमूला हटाइ क्वाटरगर्थ फरमूला नै लागू गर्न जोड
न्यूज अपडेट संवाददाता
भक्तपुर, १६ मंसिर
भक्तपुर वन पैदावार उद्योग व्यवसायी संघ, ललितपुर वन पैदावार उद्योग व्यवसायी संघ र नेपाल वन पैदावार उद्योग व्यवसायी महासंघ उपत्यका विशेष समितिको छुट्टाछुट्टै साधारणसभा तथा अधिवेशन शनिवार भक्तपुर गेष्ट हाउस, चुनदेवीमा सम्पन्न भएको छ ।
नेपाल वन पैदावार उद्योग व्यवसायी महासंघ उपत्यका विशेष समितिको छैटौं साधारणसभा र तेस्रो अधिवेशनको उद्घाटन गर्दै वागमती प्रदेश वन तथा वातावरण मन्त्री मसिना खड्काले जनसमुदायले सस्तो र सजिलो विदेशी सामग्रीतिर लागेकै कारण काठ व्यवसायीलाई समस्या आएको स्पष्ट पार्दै समस्याको समाधानका उपाय पेश गर्नुपर्नेमा जोड दिए । उनले जनसमुदाय विदेश पलायन भएकोप्रति चिन्ता व्यक्त गर्दै देशमै उत्पादन, उद्योग व्यापार गर्न प्रोत्साहन गर्नुपर्नेमा सरकारबाटै ठोस नीति अवलम्बन गर्नुपर्नेमा जोेड दिए ।
हुवर फरमूला हटाइ क्वाटरगर्थ फरमूला नै लागू गर्न दिएको सुझावलाई सरकारले मनन गर्ने बताउँदै हरेक समस्याको समाधान रहने उनको भनाइ छ ।
उपत्यका विशेष समितिका अध्यक्ष राजकुमार मल्लको सभापतिको भएको उक्त कार्यक्रममा महासंघका अध्यक्ष मन्जिल बाबु मास्के, डिभिजन वन कार्यालय, काठमाडौंका अधिकृत दिर्घनारायण कोइराला, सल्लाहकार बालकृष्ण सिवाकोटीलगायतले कार्यक्रमको सफलताको शुभकामना व्यक्त गरेका थिए ।
कार्यक्रममा प्रमुख अतिथिबाट लामो समयदेखि योगदान गर्दै गरेका व्यवसायीलाई सम्मान गरेको छ । सम्मान पाउनेहरुमा काठमाडौंबाट न्यू वनदेवी काष्ठ उद्योगका शिवहरि ढुंगाना र पी काष्ठ उद्योगका कृष्ण बहादुर गुरुङ, ललितपुर जिल्लाबाट डिजाइन फर्निचर उद्योगका पुष्परत्न बराई र त्रिपुरासुन्दरी काष्ठ उद्योगको शिव प्रसाद सितौला र भक्तपुर जिल्लाबाट प्रेरणा काष्ठ उद्योगका सूर्य बहादुर खड्का र गणेश काष्ठ उद्योगका इन्द्र प्रजापति रहेका छन् ।
त्यस्तै भक्तपुर वन पैदावारको १९औं र २०औं साधारणसभाको उद्घाटन गर्दै प्रमुख अतिथि एवं नेपाल वन पैदावार महासंघका अध्यक्ष मन्जिल बाबु मास्केले व्यवसायमैत्री नियमावलीको आशालाई निराशामा परिणत गरेकोप्रति दुःख व्यक्त गर्दै काठको मूल्य मापनमा सुधार ल्याउन सरकारले हुवर फरमूला हटाइ क्वाटरगर्थ फरमूला नै लागू गर्न जोड दिए । उनले विदेशी काठ र काठका वैकल्पिक सामानलाई बढी महत्व दिएकाले व्यवसायीमा समस्या ल्याएको बताए । साथै उनले काठ मापनको फरमूलामा परिवर्तन नल्याएसम्म व्यवसायिक रुपमा निरन्तरता दिन नसकिने बताए ।
अनिल सिवाकोटीको सभापतित्वमा भएको उक्त कार्यक्रममा डिभिजन वन कार्यालय भक्तपुरका अधिकृत विश्व कोइ््राला, महासंघका वरिष्ठ उपाध्यक्ष दिनेश राज रेग्मी, महासंघका प्रथम उपाध्यक्ष भुपेन्द्र चौलागाई, महासंघ उपत्यका विशेष समितिका अध्यक्ष राजकुमार मल्ल, वागमती प्रदेशका अध्यक्ष रवीन्द्र वैदार, काभ्रे वन पैदावारका अध्यक्ष प्रेम लामा, महासंघका द्धितीय उपाध्यक्ष तथा संघका संस्थापक अध्यक्ष एवं सल्लाहकार राजेन्द्र प्रसाद प्रजापति लगायतले शुभकामना व्यक्त गरेको थियो । कार्यक्रमलाई संघका सचिव सूर्यराम प्रजापतिले सञ्चालन गरेको थियो ।
त्यस्तै वन पैदावार उद्योग व्यवसायी संघ ललितपुरको १४औं साधारणसभाको उद्घाटन गर्दै महासंघका अध्यक्ष मन्जिल बाबु मास्केले दिगो वन कार्यविधिमै परिवर्तन आवश्यक भएको बताए । अन्य आयातित वस्तु विस्थापन गरी स्वदेशी उत्पादन नै प्रयोग गर्न व्यवसायीले योगदान गर्नुपर्नेमा उनको जोड थियो ।
कार्यक्रममा डिभिजन वन कार्यालय ललितपुरका अधिकृत राम कुमार भण्डारी, महासचिव माधवमणि हुमागाई, सल्लाहकार पुष्परत्न बराई, वागमती प्रदेशका रवीन्द्र बैदारलगायतले शुभकामना व्यक्त गरेको उक्त कार्यक्रममा सचिव सुरेन्द्र व्यञ्जनकार र कोषाध्यक्ष राजकुमार श्रेष्ठको प्रतिवेदन पारित गरेको थियो । संघका अध्यक्ष राजबहादुर सिंहको सभापतित्वमा भएको उक्त कार्यक्रममा १७ लाख ७ हजार २ सय ३७ रुपैयाँको वासलात प्रस्तुत भएको थियो ।
तीनवटै कार्यक्रममा अतिथि वक्ताहरुलाई प्रमुख अतिथिहरुबाट मायाको चिनो प्रदान गरेको थियो ।
नेपाल बन पैदावार उद्योग व्यवसायी महासंघ उपत्यका विशेष समितिको नयाँ कार्य समिति चयन भएकोे छ । समितिकाे तेस्रो अधिवेशनबाट तीर्थ महर्जनको अध्यक्षतामा नयाँ कार्य समिति चयन गरेको हो । नयाँ कार्य समितिमा वरिष्ठ उपाध्यक्षमा कृष्णगोविन्द खाईजू, उपाध्यक्षमा बिनय दवाडी, महासचिवमा दीपक पोखरेल, सचिवमा पदमराज पाठक, कोषाध्यक्षमा राजकुमार श्रेष्ठ र सदस्यहरुमा क्रमश सारदा वस्ती, योगनाथ चौलागाई, निश्न भूमी र सुरेश लोहला निर्वाचित भएका हुन् । सर्व सहमतिबाट निर्वाचित पदाधिकारीहरुलाई नेपाल बन पैदावार उद्योग व्यवसायी महासंघका अध्यक्ष मञ्जिरबाबु मास्केले बढाई तथा सपथ ग्रहण गराएका थिए । सो अवसरमा नवनिर्वाचित अध्यक्ष महर्जनले बन पैदावार व्यवसाय प्रवर्धनका लागि सबैसँग हातेमालो गरेर काम गर्ने प्रतिबधता जनाएको छ ।
