न्यूज अपडेट संवाददाता
भक्तपुर, १७ कात्तिक
भक्तपुर बचत तथा ऋण सहकारी संस्था लि.को २७ औँ स्थापना दिवसको अवसरमा आयोजित ‘भक्तपुर साकोस रापिड नेशनल चेस च्याम्पियनशीपको शुक्रबारदेखि शुरु भएको छ । नेपाल बुद्धिचाल महासंघका कोषाध्यक्ष ताराबहादुर रानाभाट र भक्तपुर बचतका अध्यक्ष निर्मल प्रजापतिले चेसको गोटी चाली उक्त कार्यक्रमको उद्घाटन गरेका हुन् ।
पहिलो दिन सम्पन्न चार चरणको खेलबाट वर्तमान नेपाल च्याम्पियन रुपेश जैसवाल, पुरुषोत्तम सिलवाल, पूर्व नेपाल च्याम्पियन बद्रीलाल नेपाली, ललितपुरका सरोज महर्जन र भक्तपुरका विक्रम चोकामी ४ अंकसहित अग्रता कायम गरेका छन् । त्यस्तै दोलखाका आशिष फुँयाल, भक्तपुरका राजेश कक्षपति, पूर्व नेपाल च्याम्पियन नवीन तण्डुकार, युवा खेलाडीहरू सुदिप तामाङ, धिरेन राई, सुरज सिंह ३.५ अंकसहित दोस्रो स्थानमा रहेका छन् ।
पाँचौ चरणदेखि नवौँ चरणसम्मका खेलहरू शनिबार बिहान १० बजेदेखि शुरू हुने आयोजक संस्थाले जानकारी दिएको छ । अपरान्ह ३ बजे भक्तपुर नगरपालिकाका मेयर सुनिल प्रजापतिको प्रमुख आतिथ्यमा पुरस्कार वितरण कार्यक्रम हुनेछ । साथै कात्तिक १९ गते बिहान ८ बजे भक्तपुर साकोसको २७ औँ स्थापना दिवसको अवसरमा सहकारीका ज्येष्ठ सदस्यहरूलाई पोषण वितरण कार्यक्रम संस्थाको प्राङ्गणमा हुने जनाएको छ ।
कार्यक्रमको उद्घाटन सत्रका प्रमुख अतिथि एवं नेपाल बुद्धिचाल महासंघका केन्द्रीय कोषाध्यक्ष ताराबहादुर रानाभाटले खेललाई संयमित रुपमा खेलिदिनुपर्नेमा जोड दिए । त्यस्तै भक्तपुर बुद्धिचाल संघका अध्यक्ष बद्री केदार दुवालले अनुशासन नै खेलको गहना भएकाले खेलाडीहरु अनुशासित भएर खेल्नुपर्ने बताए । अन्तर्राष्ट्रिय आर्विटर एवं प्रतियोगिताका निर्णायक निराजन प्रजापतिले खेलका नियमबारे जानकारी दिँदै खेलाडीहरुले खेल खेल्दा कुनै पनि इलेक्ट्रोनिक सामग्री ल्याउन चलाउन प्रतिबन्ध गरेको बताउनुभयो ।
सभापतिको आसनबाट संस्थाका अध्यक्ष निर्मल प्रजापतिले संस्थाले गरेको यस बुद्धिचाल प्रतियोगिता संस्थाबाट वार्षिक रुपमा तय गरिएका कार्यक्रमभित्रकै अंश भएको बताए । उनले संस्थाको बारेमा जानकारी दिँदै संस्थाले आर्थिक गतिविधिसँगै विभिन्न सामाजिक गतिविधिहरु सञ्चालन गर्दै गरेको स्पष्ट पारे । संस्थाका व्यवस्थापक सत्यनारायण साँयजूले सञ्चालन गरेको उक्त कार्यक्रममा शुक्रवार ४ राउण्ड र शनिवार ५ राउण्डको खेल हुने बताएको छ । देशका विभिन्न जिल्लाबाट १२८ जनाको सहभागिता रहेको उक्त कार्यक्रममा उत्साहवद्र्धक सहभागिता रहेको प्रत्यक्षदर्शीहरु बताउँछन् ।