न्यूज अपडेट संवाददाता
भक्तपुर, ३१ असार
चण्डेश्वरी अजिमा बचत तथा ऋण सहकारी संस्था लिमिटेडको शिक्षा उपसमितिको आयोजनामा सदस्यहरुको क्षमता अभिवृद्धि गर्न भएको चारदिने समाचार लेखन तालिम सोमबार सम्पन्न भएको छ ।
असार २६ गते संस्थाका अध्यक्ष पूर्ण गोपाल राजचलबाट तालिमका प्रशिक्षक एवम् पत्रकार प्रेम प्रजापतिलाई तालिम सामग्री हस्तान्तरण गरी सुरु भएको उक्त तालिमको सोमबार एक समारोहबीच समापन भएको हो ।
समापन कार्यक्रममा भक्तपुर न.पा. वडा नं. ५ का वडाध्यक्ष योगेन्द्रमान विजुक्छेँले प्रशिक्षार्थीहरुलाई प्रमाणपत्र वितरण गर्दै समाचारले समाजलाई सकारात्मक दिशातर्फ मोड्न लेख्नुपर्ने बताए । उनले समाज बैचारिक रुपमा दुई वर्गमा विभाजन हुने भएकाले वहुसंख्यक जनताको हितमा यथार्थपरक समाचार लेख्न जोड दिए । साथै सहकारी संस्थाले यससँगै समाजमा सकारात्मक परिवर्तनका लागि अनुसन्धानात्मक र आलोचनात्मक रुपमा लेख्न सक्ने लेखक तयार गर्नुपर्ने बताए । समाचारले सरकारको गलत कार्यको भण्डाफोर गर्ने भएकाले यसलाई ‘वाचडग’का रुपमा लिएको उनको तर्क छ ।
संस्थाका सञ्चालक अध्यक्ष पूर्णगोपाल राजचलले समाचार लेख्दा सत्यतथ्यलाई ध्यान दिई समाज परिवर्तनका निम्ति लेख्नुपर्ने बताए । साथै उनले संस्थाका ऋणी सदस्यहरुले साँवा ब्याज समयमै तिरी सहयोग गर्नुपर्नेमा जोड दिए ।
संस्थाका संस्थापक अध्यक्ष एवम् व्यवस्थापक नारायण प्रसाद त्वानाबासुले तालिमको समापनसँगै समाचार लेखनको सुरुवात भएको बताए । उनले समाजको उन्नति र प्रगतिका लागि समाचार लेखी ज्ञान दिनुपर्नेमा जोड दिए । घटेका घटनाको पूर्ण निगरानीका साथ सकारात्मक प्रभावका लागि लेख्नुपर्ने बताउँदै उनले संस्थाले आर्थिकसँगै सामाजिक क्षेत्रमा लाग्न प्रेरित गरिरहेको बताए ।
तालिमका प्रशिक्षक प्रेम प्रजापतिले छोटो समयमा लिएको तालिमबाट प्राप्त ज्ञान सिपलाई प्रयोगमा ल्याउनुपर्ने बताए । उनले तालिमको महत्व र यसबाट पर्ने प्रभावबारे बताउँदै प्रयोगात्मक कार्यले मात्रै निखार्ने बताए ।
आयोजक समितिका संयोजक विष्णुप्रसाद कर्माचार्यले संस्थाबाट प्रदान गरेका विभिन्न तालिमले संस्थाको दिगो विकासमा टेवा पुर्याउने बताए ।
कार्यक्रममा प्रशिक्षार्थीद्वय विकेश मचामसी, सुनिता गःपीले चारदिने समाचार लेखनको अनुभव व्यक्त गरेको उक्त कार्यक्रममा संस्थाका अध्यक्षबाट प्रशिक्षकलाई मायाको चिनो प्रदान गरेको थियो । कार्यक्रममा उर्मिला प्याथले पनि बोलेको थियो ।
