न्यूज अपडेट संवाददाता
भक्तपुर, १९ असोज
जनता बाँचे भाषा बाँच्छ भन्ने मूल नाराका साथ ने.सं. ११०० देखि भक्तपुरका विभिन्न स्थानहरुमा भइरहेको दुईदिने नेपाल भाषा साहित्य तःमुंज्या(सम्मेलन) र सांस्कृतिक कार्यक्रम यसपाली नपुखुमा सम्पन्न भएको छ ।
साहित्यिक क्षेत्रका साहित्यकारहरुबाट साहित्य बाचन हुने र राष्ट्रिय अन्तर्राष्ट्रिय विषयका विज्ञहरुबाट विभिन्न विषयमा प्रशिक्षण समेत हुने उक्त कार्यक्रम यस वर्ष कौलाथ्व द्धादशी (असोज १७) र त्रयोदशी(असोज १८) का दिन भएको हो ।
कार्यक्रमका प्रमुख अतिथि नेपाल मजदुर किसान पार्टीका अध्यक्ष नारायणमान विजुक्छेँ(रोहित)ले भदौ २३ र २४ गते भएको जेनजी आन्दोलनमा भएको उपद्रोका विषयमा यिनीहरु आफै अनभिज्ञ भएको बताए । उनले असंगठित शक्तिबाट कुनै खालको कार्य गर्न नसकिने बताउँदै उक्त कार्य गर्न उक्साउने गरी लामो समयको योजना मुताविक भएको बताए । शासन पद्धतीमा तत्काल परिवर्तन हुनुको भित्री रहस्य हुने बताउँदै उनले ती कार्यका लागि तालिमसहितको योजना हुने स्पष्ट पारे । उक्त गतिविधिमा अमेरिका र हिन्दूस्तानले निर्देशन नदिई केही नहुने तर्क राख्दै उनले माथिल्लो तह नै अरुको हातबाट चलेको बताए । जेनजीको बुद्धिले होइन, ठूला मान्छेको बुद्धिले यस्तो कार्य हुन गएको तर्क राख्दै उनले देशको राजनीतिक सत्ता परिवर्तनका लागि विदेशीको सक्रियता रहेको औंल्याए ।
आन्तरिक कुरा थाहा नहुने मान्छेबाट सिंहदरबारमा आगो लगाउन असम्भव भएकाले त्यसमा भित्री रहस्य थाहा भएका मान्छेबाटै भएको उनको धारणा छ । जनता सचेत भए मात्र देश अघि बढ्ने बताउँदै जनताको सेवा बाहेक अन्य कुनै स्वार्थ नरहेको उनले बताए । जनतासँग संवाद गरी कार्य गरे कुनै पनि कार्य असफल नहुने उनले स्पष्ट पारे । चोर डाँकाहरुबाट सञ्चालित पार्टीलाई जनताले विश्वास नगर्ने बताउँदै उनले चुनावमा जित्नकै लागि नागरिकता विध्ययक पारित गरेको औंल्याए । साधारण जनतालाई लोभ लालचमा फसाई भोट लिएको तर्क राख्दै ती जनताबीच बैचारिक कार्यक्रमहरु गर्दै लानुपर्नेमा उनले जोड दिए । जनतालाई सचेत र संगठित बनाउन र प्रजातन्त्र हुर्काउन निरन्तर सांगठनिक कार्य गर्दै जाने उनको तर्क छ । कुनै खालको हटार नगरी निरन्तर संघर्ष गरी नथाकिकन देश बनाउन सतर्क गराउनुपर्ने उनले बताए । अमेरिका र हिन्दूस्तानले निर्देशनमै दलाइ लामाले नेपालका प्रधानमन्त्रीलाई शुभकामना दिएको उनको तर्क छ ।
त्यस्तै नेपाल मजदुर किसान पार्टीका सचिव प्रेम सुवालले विभिन्न पार्टीले गरेका अनैतिक भ्रष्टाचार र वेथितिका कारण देश बिग्रेको बताउँदै नेपाल भाषा साहित्य तःमुंज्याले जनताको पक्षमा साहित्यमार्फत स्पष्ट पारेका बताए । उनले सदन र सडकमा एमसीसी विरुद्ध आन्दोलन गर्दा पनि पास गरेर देशघाटी कार्य गरेको स्पष्ट पारे ।
विभिन्न क्षेत्रका विज्ञ व्यक्तिहरुबाट तःमुंज्याको निरन्तरताको कामना गर्दै विचार व्यक्त गरेको उक्त कार्यक्रममा साहित्यकारहरुबाट कविता, कथा, निबन्ध, गजल, गीतलगायतका विधाहरु प्रस्तुत गरेको थियो ।
दुई दिने उक्त कार्यक्रममा कवितातर्फ संगीता पंच प्रथम, गंगाराम ज्याख्व द्धितीय, सत्यनारायण सुवाल तृतीय, लक्ष्मी प्रसाद कासुला र सुनिता गाईसी सान्त्वना, निबन्धमा के.जी आचार्य सान्त्वना, कथामा श्रीया पहिजू प्रथम, एल.के.सुन्दर द्धितीय, सूर्यनारायण फाँजु तृतीय पुरस्कार जितेका छन् ।
दुवै दिनको साँझ सांस्कृतिक विधाहरु प्रस्तुत भएका थिए ।
