न्यूज अपडेट संवाददाता
भक्तपुर, ८ मंसिर
भक्तपुर बचत तथा ऋण सहकारी संस्थाले भक्तपुर जिल्ला बचत तथा ऋण सहकारी संघका नवनिर्वाचित पदाधिकारीहरुलाई आइतबार स्वागत तथा बधाई ज्ञापन गरेको छ ।
संस्थाका अध्यक्ष निर्मल प्रजापतिले खाडा, भादगाउँले टोपीबाट स्वागत गरेको उक्त कार्यक्रममा जिल्ला बचत तथा ऋण सहकारी संघको यहि कार्तिक २९ गते सम्पन्न २१ औं वाष्किि साधारण सभाबाट अध्यक्ष पदमा निर्वाचित मित्र बचत तथा ऋण सहकारी संस्थाका हरिकृष्ण बल्ल र उपाध्यक्ष पदमा निर्वाचित भक्तपुर बचत तथा ऋण सहकारी संस्था लिमिटेडका सचिव जगनाथ प्रजापतिलाई स्वागत तथा बधाइ ज्ञापन गरेको हो ।
कार्यक्रममा संस्थाका अध्यक्ष निर्मल प्रजापतिले भक्तपुर जिल्लाको सहकारी आन्दोलनमा जिल्ला संघबाट निरन्तर सक्रियता देखाएकै कारण सहकारी क्षेत्रमा अन्य जिल्लाको तुलनामा विकृतिमा कमि आएको बताए । उनले राम्रो कामको सुरुवात भए सबैको साथ पाउने बताउँदै जिल्ला संघलाई एकै वर्ष तीन तहबाट सम्मान पाएको औंल्याए । साथै सहकारी निर्माण र आगामी अभियानमा नयाँ नेतृत्वको भूमिका अझ उत्कृष्ट हुने उनको विश्वास छ । उनले देशमा सहकारी क्षेत्रमा आएको विकृतिलाई हटाउन अबको नेतृत्व सफल हुने अपेक्षा गरेको छ ।
संघमा निर्वाचित अध्यक्ष हरिकृष्ण बल्लले हरेक समस्यालाई सामुहिक रुपमा निरुपण गरिरहेको बताउँदै उनले भक्तपुर बचत र मित्र बचत बीचको सम्बन्ध र सहकार्य निरन्तर भइराख्ने बताए । उनले भक्तपुर जिल्लाका प्रारम्भिक सहकारी संस्थाका सबै समस्याको सम्बोधन गर्ने प्रतिबद्धता व्यक्त गरे ।
संस्थाका सचिव एवम् जिल्ला संघमा निर्वाचित उपाध्यक्ष जगनाथ प्रजापतिले प्रारम्भिक संस्था रहेमात्रै संघ रहने बताउँदै संघको लागि भक्तपुर बचतले सुरुदेखि नै निरन्तर सहयोग गरिआएको बताए । निर्वाचित पदाधिकारीबाट सहकारी आन्दोलनमा नेतृत्वदायी भूमिका निर्वाह गर्ने उनको प्रतिबद्धता छ ।
कार्यक्रममा संस्थाका व्यवस्थापक सत्यनारायण साँयजुले पनि बोलेको थियो ।
