न्यूज अपडेट संवाददाता
भक्तपुर, २२ कार्तिक
भक्तपुर बचत तथा ऋण सहकारी संस्था लिमिटेडको २९औं स्थापना दिवसको अवसरमा स्वास्थ्य क्षेत्रका डा. अशोकानन्द मिश्र र भलिबलका प्रशिक्षक एवं रेफ्रि विनोदचरण रायलाई शनिबार संस्थाको प्राङ्गणमा आयोजित एक समारोहबीच सम्मान गरेको छ ।
वि.सं. २०५४ कार्तिक १९ गते भक्तपुरको च्याम्हासिंहमा ४० जना संस्थापक सदस्यहरुको १ लाख २० हजार पूँजीबाट विधिवत रुपमा डिभिजन सहकारी कार्यालय भक्तपुरमा दर्ता गरी सुरु भएको उक्त संस्थामा यहि कार्तिक १९ सम्ममा ४ अर्ब ४६ करोड, ३६ लाख ६८ हजार ५२८ रुपैयाँको वासलात बनेको संस्थाले जानकारी दिएको छ ।
कार्यक्रमका प्रमुख अतिथि एवम् नेपाल मजदुर किसान पार्टीका अध्यक्ष नारायणमान बिजुक्छेँले सम्मानित व्यक्तित्वलाई बेताली, दोसल्ला र नगद रु.२० हजारसहित सम्मानपत्र वितरण गर्दै देश र जनताको लागि निःस्वार्थी रुपमा सेवा गरेकालाई जनताले अभिनन्दन गर्ने बताए । सहकारी क्षेत्रमा लाग्नेले इमानदारीपूर्वक काम गर्दा पनि कानुनी कठिनाइ आउन सक्ने भएकाले उनले सचेत भई कानुनी ज्ञान अध्यावधिक गरिरहनुपर्नेमा जोड दिए । वर्तमान राजनीति पूँजीवादी व्यवस्थाबाट निर्देशित भएकाले राम्रो विचारलाई अनुशरण गर्नुपर्ने र विचार नबुझिकन कुनै पनि पार्टीमा लाग्न नहुने औंल्याए । आफ्नो राजनीतिक अनुभव बताउँदै उनले भने, ‘कि राजनीति गर्दै नगर्ने, गर्ने भए नडराउने ।’ साथै मल किन्न पैसा नहुने, विउविजन किन्न पैसा नहुने भएकाले कृषिजन्य क्रियाकलाप गर्नका लागि सहकारी स्थापना भएकोमा अहिले करोडपतिहरुले सहकारी संस्थामा हैकम चलाएकाले ठगिने सम्भावना बढेको उनको भनाइ छ । ठूला पार्टीका नेताहरुले नियम र कानुन बमोजिम नै सहकारीबाट कम ब्याजदरमा ऋण लगेकोले जतिसुकै ठगेपनि भ्रष्टाचार गरेपनि भ्रष्टाचारको आरोपमा जेल पठाउन नसकेको उनले स्पष्ट पारे । अहिलेका सहकारी संस्थामा हरप्रकारका हरक्षेत्रका मानिस सदस्य हुने भएकोले सहकारीको नीतिबमोजिम काम गर्न गाह्रो हुने र कृषि सहकारी संस्थामा त्यस क्षेत्रका मात्र आबद्ध हुने भएकाले सहज हुने उनले बताए ।
त्यस्तै सम्मानित व्यक्ति डा अशोकानन्द मिश्र उर्फ डारिवाल डाक्टरले कसैका लागि कुनै योगदानविनाको सम्मान आफूले अस्वीकार गरेको बताउँदै यो सम्मान भक्तपुरका जनताका तर्फबाट पाएकोमा खुसी व्यक्त गरे । उनले भक्तपुरका जनताको सेवा गर्ने क्रममा भएका अनुभव सुनाउँदै भक्तपुर बचतप्रति सम्मान गरेकोमा आभार प्रकट गरे ।
अर्का सम्मानित व्यक्ति भलिबलका राष्ट्रिय प्रशिक्षक एवम् अन्तरराष्ट्रिय भलिबल खेलाडी विनोदचरण रायले खेल क्षेत्रमा आफूले गरेको कार्यको मूल्यांकन गरी सम्मान गरेकोमा आभार प्रकट गर्दै खेलाडी रहँदा अनुशासनका कुरा गर्नेहरु खेल छोडिसकेपछि बिग्रिँदै गएकोप्रति चिन्ता व्यक्त गरे । उनले खेलसँगै सामाजिक क्रियाकलापमा समाहित हुनुपर्ने कुरा बिजुक्छेँबाट सिकेको बताए ।
वागमती प्रदेश सभाका सभासद् सृजना सैंजूले पूँजीपतिलाई ठगी गर्न हौस्याउने र जनतालाई दुबाउने खालको नीति पूँजीवादी सरकारले ल्याउने भएकाले त्यसबाट सचेत हुनुपर्नेमा जोड दिए । उनले लेनिनको आदर्श सोचलाई आत्मसात गर्दै आर्थिकसँगै सामाजिक गतिविधिमा भक्तपुर बचत लागेकोमा खुसी व्यक्त गरे । भक्तपुर बचतले खोलेको आदर निकेतनसँगै अब शिशु स्याहार र बाल उद्यानको बन्दोबस्त गर्दैजानुपर्ने उनको कथन छ । साथै उनले भक्तपुरमा प्रत्येक वडामा शिशुस्याहार र आदर निकेतन बनाउन सबै लाग्नुपर्नेमा जोड दिए ।
कार्यक्रममा भक्तपुर नगरपालिका ९ वडाका अध्यक्ष रवीन्द्र ज्याख्वले ब्याजको लोभमा लागेर बचत गर्दा जनताले दुःख पाएको बताउँदै सामाजिक रुपमा लागेका सहकारीलाई मात्र विश्वास गर्नुपर्नेमा जोड दिए । उनले भक्तपुर नगरपालिकाका प्रतिनिधिहरु तिब्बतको शान्नन शहरमा अबलोकनमा जाँदा भएका अनुभव सुनाउँदै त्यहाँको सहकारी जस्तै हामी पनि लाग्नुपर्ने बताए । समाजको आर्थिक स्तर उकास्न भक्तपुर बचत लागिरहेको बताउँदै तिब्बतमा जस्तै नेपालमा गर्न सके धेरै कुरामा विकास गर्नसक्ने स्पष्ट पारे ।
भक्तपुर बचत तथा ऋण सहकारी संघका अध्यक्ष कृष्णगोविन्द लाखाले न्यून आय भएका जनताका लागि सहकारी खोल्ने ऐन, कानुनमा रहेपनि पूँजीपति वर्गले आफ्नो व्यक्तिगत स्वार्थका लागि सहकारी संस्थाहरु खोलिरहेको बताए । उनले त्यस्ता व्यक्तिहरुबाटै सहकारीभित्र अनियमितता, अपारदर्शिता र ठगी कार्य भइरहेको स्पष्ट पारे ।
संस्थाका संस्थापक अध्यक्ष सत्यनारायण प्रजापतिले संस्था स्थापना गर्नुका उद्देश्य र आजको सहकारी सम्बन्धमा स्पष्ट पार्दै संस्थाको दिगो विकासमा लागेका सदस्यहरुप्रति आभार प्रकट गरे ।
संस्थाका उपाध्यक्ष एवम् भक्तपुर आदर निकेतनका अध्यक्ष लक्ष्मी प्रसाद कुसीले प्राधिकरणबाट सहकारीमा गरेको अनुगमनबारे स्पष्ट पार्दै प्राधिकरणका निर्देशन, मापदण्ड अनुसार मात्र चल्ने हो भने सहकारी संस्था नै बन्द हुने बताए । साथै उनले आर्थिकसँगै सामाजिक उत्तरदायित्वको रुपमा भक्तपुर आदर निकेतन खोलेकोमा यसको दिगो विकास र कार्यान्वयनका लागि सहयोगी हातहरुको आवश्यकता रहेको स्पष्ट पारे । सोही क्रममा त्यसै कार्यक्रममार्फत संस्थाका सदस्य शमशेर प्रजापति र मन्दिर प्रजापतिले आदर निकेतनका लागि २ लाख रुपैयाँको चेक आदर निकेतनका अध्यक्षलाई हस्तान्तर गरे ।
त्यस्तै भक्तपुर बचतको २८ औं वार्षिक साधारण सभाबाट पारित ‘भक्तपुर साकोस छात्रवृत्ति कार्यविधि २०८२’ बाट व्यवस्था भए अनुसार यसवर्ष समाज सुधार मावि र ब्रहायणी आधारभूत विद्यालय छनोटमा परेको छ । त्यसअनुसार समाज सुधार माविलाई ७ लाख ३५ हजार रुपैयाँ र ब्रम्हायणी आविलाई २ लाख ४४ हजार रुपैयाँको चेक संस्थाका अध्यक्ष निर्मल प्रजापतिबाट प्रदान गरेको छ ।
संस्थाका अध्यक्ष निर्मल प्रजापतिको सभापतित्वमा भएको उक्त कार्यक्रममा संस्थाका सचिव जगनाथ प्रजापति, सदस्य रामेश्वरी कोजूलगायतले बोलेको थियो । कार्यक्रमका अतिथिहरुलाई अध्यक्ष प्रजापतिले मायाको चिनो प्रदान गरेको थियो ।
