न्यूज अपडेट संवाददाता
भक्तपुर, ११ मंसिर
भक्तपुर बचत तथा ऋण सहकारी संस्थाको सांस्कृतिक उपसमितिको आयोजनामा बिहीबारदेखि नौ महिने नौबाजा प्रशिक्षण सुरु भएको छ । भक्तपुर बचतका सम्मानित व्यक्ति एवम् बाद्यगुरु पञ्चलाल लाछिमस्यू प्रशिक्षक रहेको उक्त प्रशिक्षणमा ४० जनाको उत्साहजनक सहभागिता रहेको संस्थाले जनाएको छ ।
कार्यक्रममा संस्थाका अध्यक्ष निर्मल प्रजापतिले भक्तपुरमै पहिलोपटक भक्तपुर बचतबाट सांस्कृतिक अभियान चलाएको बताए । उनले समाजको सांस्कृतिक उत्थान र सामाजिक दायित्वको रुपमा सांस्कृतिक क्षेत्रमा पाइला चालेको भक्तपुर बचतले हालसम्ममा आर्थिकसँगै खेलकुद, स्वास्थ्य, शैक्षिक एवम् सामाजिक क्रियाकलापहरुमा योगदान गरिरहेको बताए । सहकार्यबाटै सहकारी चलेको बताउँदै उनले आफूले सिकेका बाजा अरुलाई सिकाएमा त्यसबाट आफ्नो व्यक्तित्व विकासमा सघाउ पुग्ने बताए । सभ्य नागरिकको पहिचानलाई निरन्तरता दिनुपर्ने बताउँदै उनले तालिम अवधिभर अनुशासित र नियमित उपस्थित भई आफ्नो सिपलाई निखार्नुपर्ने बताए । उनले भक्तपुर बचतको ख्यातिलाई अझ उँचो राख्न लामो अवधिसम्म दिइने प्रशिक्षणलाई ध्यान दिनुपर्ने बताए । बाजाको संरक्षण र सम्बद्र्धन गरी प्रशिक्षार्थीहरुले प्रयोग गर्नुपर्नेमा जोड दिँदै उनले भक्तपुरको सांस्कृतिक क्षेत्रमा सहकारीको चलाएको अभियानमा सबैले साथ दिनुपर्ने बताए ।
नौ बाजाका प्रशिक्षक एवम् बाद्यगुरु पञ्चलाल लाछिमस्यूले अहिलेसम्मको प्रशिक्षणमा यस्तो सहभागिता कहिल्यै नपाएको उल्लेख गर्दै उनले यसलाई सिकाइ अवधिभरसम्मै कायम राख्नुपर्ने बताए । उनले यो प्रशिक्षण संस्थाकै लागि पनि ठूलै उपलब्धी भएकाले संस्थाको उद्देश्य पूरा गर्न सबै लाग्नुपर्ने बताए । हरेक क्षेत्रमा अनुशासनको महत्व हुने भएकाले यो प्रशिक्षणको क्रममा पनि अनुशासित प्रशिक्षार्थीले बढी सिक्ने उनको भनाइ छ ।
धिमेमैचाको नाउँमा प्रख्यात बाद्य गुरुआमा इन्दिरा लाछिमस्यूले भक्तपुरको लोकबाजा र कला संस्कृतिलाई जगेर्ना गर्ने अभियानमा लागेको भक्तपुर बचतप्रति आभार प्रकट गर्दै उनले प्रशिक्षार्थीहरुले सिकिसकेपछि मञ्च आफै बन्ने बताए । उनले धैर्यताले नै मानिसलाई सफल बनाउने बताउँदै सबैले निरन्तरता दिनुपर्ने औंल्याए ।
अर्का बाद्य गुरु रभिम कपालीले नौ बाजा परम्परागत लोक बाजा भएकाले यसको सम्बद्र्धन र संरक्षणमा भक्तपुर बचतले धेरै पहिलेदेखि नै ध्यान पुर्याइरहेको बताए । साथै नौ बाजाको परिचय दिँदै भक्तपुर र अन्य जिल्लामा यसको प्रयोग र अहिलेको अवस्थाबारे उनले स्पष्ट पारे ।
आयोजक समितिका संयोजक नारायणी खोँजूले नौ बाजा प्रशिक्षण लामो छलफलपछिको निर्णय भएकाले भक्तपुरको सांस्कृतिक अभियानमा नौबाजा प्रशिक्षण भक्तपुर बचतको नयाँ पाइला भएको स्पष्ट पारे । कार्यक्रममा आयोजक समितिका सदस्य प्रज्ज्वल प्रजापतिले पनि बोलेको थियो ।
नाै बाजा अन्तर्गत अहिले प्रशिक्षणमा रहेका बाजाहरू करखिं, पास्ट, धिमेचा, धाँचा, नायेखिं, काे खिं, पछिमा, नगरा र धलक रहेका छन् ।
